Jowai, Naiwieng 21
Ka Jowai Municipal Board (JMB) ha ka step 21 tarik Naiwieng ka la rah da kawei ka puh shilum bad kawei ka trok ban khat bad weng ïa ki ñiut ki ñier, ki jaboh-jabaiñ kiba la set kut ïa kawei ka surok paidbah kaba don ha syndah ka Iawthymme bad Iew CNI, Jowai. Kane ka la wan long ruh hadien ka jingkyrpad jong ka Dorbar Shnong Ladthadlaboh ïa ka Jowai Municipal Board (JMB) ba kan pynkhuid ïa kitei ki jaboh kiba la satah ha katei ka surok na ka jingbret pathar ïa ki plastic, ki bitor, ki jaiñjot, ki tiar ba pyndonkam ha ki dukan bad kiwei kiwei jaboh.
Ha kane ka jingleit pynkhuid la donlang ki nongïalam shnong ka Ladthadlaboh naduh u Waheh Shnong Ma Aiban Shullai, Chairman JMB Ma Philanderwell Lyngdoh, Special Officer In-charge Market JHADC Ma CS Mannar, In-Charge CNI Market Rev. GS Shullai nalor kiwei kiwei.
U Waheh Shnong Ladthadlaboh u la ai khublei kyrpang ïa ka CEO jong ka JMB kaba la pdiang ïa ka jingtyrwa jong ka Dorbar Shnong ban pynkhuid ïa kine ki ñiut.
Kane ka jaka kam dei tang ka bynta jong ka Ladthadlaboh hynrei ka jingkitkhlieh lang da baroh naduh ka JHADC, CNI, ki nongshong ïew shong hat, ki nongthied-nongpet kumjuh ki nongshong shnong najan-najngai kiba wan ban breh ñiut ha kane ka jaka, la ong u Ma Shullai.
U Ma Shullai u la pyntip ruh ba ka Dorbar Shnong kan buh da ki ‘signboard’ ban maham bad khang pyrshah ïa kino-kino kiba ju mlien ban bret pathar ïa ki ñiut ym tang ha kane ka jaka hynrei wat sha kiwei-kiwei ki jaka ruh namar ka jingbret pathar ïa ki ñiut ki ñier kan ktah ïa ka koit ka khiah bad pynsniew ïa ka lyer bad ki um ki wah.
Ha kaba ïadei bad ka surok, u Ma Shullai u la pyntip ba ka Dorbar Shnong ka la dep ban buh jingthoh sha u MLA bad u khmih lynti ba na ka liang u MLA ruh un shimkhia kumba u la kular ban pyntrei ïa kane ka surok khnang kan long ka surok kaba bit-biang na ka bynta ban ïaid ki kali motor bad ba ki paidbah ruh kin lait na ka jingbret pathar ïa ki ñiut ñier ha kane ka surok.
U Chairman JMB Ma Philanderwell Lyngdoh u la ong, ka jingbret pathar ïa ki ñiut ka dei kawei na ki jingpang ba shyrkhei bha hapoh ka shnong Jowai bad ki nongshong shnong ki shim kabu ban bret ñiut ha ki jaka ba ki ñiut ki lang thup. Kumta u la kyntu ïa baroh ki nongshong shnong ban don ka jingkitkhlieh bad ban ap ïa ka kali kit ñiut jong ka Municipal.
U Chairman ka JMB u la maham ruh ïa ki riew shim kabu kiba kamai pisa da kaba kit ñiut da ki kali ha man ki thliew ïing bad lada lap ïa kiba kum kine ki kali yn pynshitom katkum ka aiñ bad u la kyntu ruh ïa ki riew paidbah ban ringdur lada lap ïa kum kine kali bad yn ai khusnam ïa kiba pyntip.
