Shillong, Naiwieng 21
U Working President ka National People’s Party (NPP), Bah Wailadmiki Shylla u la ong ba ki paidbah ki la shah thok ha ka Voice of the People Party (VPP) da kaba ai tiket ïa u MDC ba mynta ka JHADC, u Bah Andrew Shullai na North Jowai.
Lah ban kdew ba ka VPP dang shen ka la pynbna ïa ki kyrtong na ka bynta ka ilekshon MDC ka ban sa long, ba kynthup 24 ngut ki ban ïakhun ha Jaiñtia Hills Autonomous District Council (JHADC) bad 27 ngut ki ban ïakhun ha Khasi Hills Autonomous District Council (KHADC).
U Bah Shylla uba dei u MLA ka Jowai u la ong ba ka long kaba kyndit ban ïohi ba ka VPP ka pynbna kyrtong da uba la dei lypa u MDC, namar ki paidbah ruh ki dang khmih lynti ba ka VPP kan bat ïa ka nongrim bad ïa kaei kaba ki la kren.
“Ngi te ngi la pynkhreh ban ïakhun pyrshah ïano-ïano ruh, hynrei ka long kaba kyndit, nga sngew ba ki paidbah ki la shah thok ha ka VPP, namar katkum ki jingkren jong ki ngi ïohi ba ki kam ba ki bat nongrim, dei ma ki ba ong ban nym ai tiket ïa ki briew ba la don shwa bad kiwei ki seng saiñpyrthei la ki long ki MLA ne MDC”, u la ong.
U la ong ba ka NPP kam don jingpher lada dei uno-uno u kyrtong ne kano-kano ka seng ruh ka la pynkhreh ban ïa aireng kumba ju long ha man la ki ilekshon, ha kaba u la pynpaw ruh ba u la ïakhun pyrshah bad u Bah Andrew Shullai ha ki ar tylli ki ilekshon.
Haba kylli, u Bah Shylla u la ong ba um ïohi ei-ei ka jingma na ka jingmih ka VPP ha kane ka ilekshon MDC ban sa long.
“Ngam ïohi ba ka VPP kan dei ka jingma ïa ka NPP. Ki paidbah kim dei ban sngewthuh bakla, watla kiba bun hi ki shim ba ka MDC bad MP ilekshon kan long kumjuh, hynrei ki dei ban tip ba ka ïapher bha namar ha ka ilekshon MDC ki paidbah ki ithuh bad ïadei beit bad ki kyrtong”, u la ong.
Ha kawei ka liang u Nongïalam ka NPP u la ong ba ka seng ka la pynkhreh bha na ka bynta ka ilekshon, ha kaba u la ïathuh ba ha Jaiñtia Hills ki don bun ki konstitwensi kiba mih palat 2 ngut kiba pan tiket, bad haduh mynta sah sa tang kumba 3-4 tylli ki konstitwensi ki bym pat pynbeit ïa ki kyrtong.
“Kumba ka long mynta nga ïohi ba u paidbah u dang pyni ka jingshaniah ïa ka NPP”, la ong u Bah Shylla.
