Shillong, Naiwieng 21
Ka jingñiew na ka bynta ka ilekshon MLA shiteng samoi ha Gambegre konstitwensi kan long ha ka sngi Saitjaiñ hapdeng ka jingpahara kaba khlaiñ ha kaba ki bor pahara kin long shi pyrton ki pulit Central Armed Police Force (CAPF) kiba dei ki CRPF bad shi pyrton ki pulit ka Jylla lane State Armed Police Force (SAPF).
Ka jingñiew ‘vote’ kan long ha Tura naduh ka por 8 baje mynstep bad yn pynïaid ïa ka jingñiew ‘vote’ da u Returning Officer lem bad kiwei kiwei ki ophisar kiba pynïaid ïa ka ilekshon.
Haba ïakren bad u Returning Officer na ka bynta ka ilekshon ha Gambegre u la ong ba ka jingñiew kan ïaid haduh saw wat bad kin don 12 tylli ki miej ñiew ‘vote’ hapoh ka jaka ñiew ‘vote’.
Haba ïadei bad ka jingpynkhreh ïa ki pulit pahara ha ka jaka ñiew ‘vote’ bad shabar ka jaka ñiew ‘vote’, la ong ba kin don shi pyrton ki pulit CAPF kiba dei ki CRPF bad sa shi pyrton pat ki dei ki pulit ka jylla (SAPF).
ka rukom pahara kan long ha ki lai syrtap kata ka long shi kynhun kin pahara kham jngai na ka jaka ñiew ‘vote’, shi kynhun ha khyrdop ban rung shapoh ka jaka ñiew ‘vote’ bad shi kynhun pat kin don hapoh ka jaka ñiew ‘vote’.
Ka jingpoi thep ‘vote’ ha ka ilekshon MLA shiteng samoi ha Gambegre ka long 90.93%.
Mano ban long nongjop ban mihkhmat ïa ka Gambegre konstitwensi sha Ïingdorbar Thawaiñ ka Jylla yn sa tip shai ha ka sngi ñiew ‘vote’.
Ha kane ka ilekshon shiteng samoi, ka jingïakhun ka long kaba jwat bad ka dei ruh ka jingïakhun na ka bynta ka burom khamtam eh ïa ka NPP bad ka Congress.
Ka Congress ka dei ban jop khnang ban bat biang ïa ka Gambegre konstitwensi kaba la ju mihkhmat da u MLA ka Congress u Saleng A Sangma uba la long mynta u MP ka Tura, katba ka NPP ka hap ban jop ïa kane ka ilekshon kum ka seng kaba don ha ka bor synshar, khamtam haba ka pynïakhun da ka kurim jong u Myntri Rangbah ka Chandee A Sangma kum ka kyrtong.
Ka Congress ka pynïakhun da u Jingjang M Marak kum u kyrtong bad ka TMC ka pynïakhun da ka Sadhiarani Sangma kaba dei ka kyrtong jong ka All India Trinamool Congress (AITC) bad kaba dei ruh ka hep kynsi jong u Dr Mukul Sangma uba dei u nongïalam ka Liang Pyrshah ha Ïingdorbar Thawaiñ ka Jylla bad ruh u Myntri Rangbah barim ka Jylla. Kiwei pat ki kyrtong ki long u Bernard N Marak jong ka BJP uba dei ruh u MDC, nalor ar ngut ki kyrtong shimet u Sengkrabirth M Marak bad u Jerry A Sangma.
