Shillong, Naiwieng 21
Kum shibynta ka jingrakhe ïa ka sngi kyrpang jong ki Riewlum hapoh ka Ri India ïa kaba la tip kum ka Janjatiya Divas 2024, na ka liang ka seng ki nongthoh kot Khasi ba la tip kum ka Khasi Authors’ Society (KAS) ha ka 21 tarik u Naiwieng 2024, ka la pynlong ïa ka lympung ki nongthoh lane ka ‘Writers Conclave’ halor ka phang ‘Ka Thir Bniah ïa ka Jinglong Kyrpang u Khasi ha ka kolshor’ lane ‘Exploring the Cultural Identity of the Khasis.
Haba ai jingkren ha katei ka sngi, na ka liang u Dr. DRL Nonglait, President ka Khasi Authors’ Society (KAS), u la ong ba ki don lai tylli ki syrtap kiba long kiba donkam eh ban pyrkhat kum u Khasi bad kita ki long ïa ka jinglong kyrpang u Khasi, ïano la khot u Khasi ne uei u Khasi bad ka kolshor u Khasi.
U Dr. Nonglait u la ong ba baroh ki dkhot jong kano-kano ka Jaitbynriew ki sngewthuh ïa kaei ba ka Jaitbynriew ka sngewthuh bad ka pyrkhat.
“Ym don kiwei pat ki Jaitbynriew kiba don ïa ka khana jong u Hynñiewtrep-Hynñiewskum. Ngi kum ki Hynñiewtrep ngi don ïa ki jinglong ba kyrpang bad haba phai sha ka Jaitbynriew Khasi, ngi don ka jingsngewskhem ban ïathuh sha ka pyrthei ba ngi long shisha ka kynhun Jaitbynriew kaba kyrpang kaba kdup lang ïa khun-ki ksiew jong ka Hynñiewtrep bad uno-uno u bym don ka tynrai kum u khun Hynñiewtrep um lah ban kam ba u dei u Khasi”, ong u Dr. Nonglait.
Shuh-shuh u Dr. Nonglait u la ong ba ka jingtlot ne jingkhlaiñ jong kano-kano ka Jaitbynriew ka shong eh ha ka jingieid jong ki ïa la ka jong ka Jaitbynriew.
“Lada ngi ieid ïa ka Jaitbynriew, ka Jaitbynriew kan khlaiñ hynrei lada ngim ieid shisha, ka Jaitbynriew kan tlot”, bynrap u Dr. Nonglait.
Na ka liang u Bah FR Kharkongor, Principal & Secretary ka tnad Arts & Culture, u la ong ba kaba donkam bha ïa ka Jaitbynriew ka dei ka jaka-ka puta, ka ktien-ka thylliej bad ka jait-ka khong.
Da kaba pynkynmaw ruh ba mynta u snem, na ka liang ka tnad Arts & Culture ka la pyrshang ban pynmih ïa ka jingrwai jong ka Jylla ne ka ‘State Anthem’ ha kaba ki la mih bun ki jingpyrshah namar ka jingkynthup tang ïa ka ktien Khasi, Garo bad Phareng ha katei ka jingrwai bad na ka liang ka Sorkar Jylla ruh kim pat lah satia ban rai haduh mynta halor ka jingpynïaid shakhmat ïa katei ka jingrwai.
“Na ka liang ka tnad Arts & Culture, ngi khot ïa phi ka KAS ba phin ai jingmut bad ba phin donlang ha ka jingïathir-jingïatai ba kumno ngin ïaid shakhmat halor kane. Ngim kwah ban pynmong ïano-ïano ruh ha kaba kut ka sngi ne ban pynduh mynsiem hynrei kum ka kynhun, ngi long hi kawei hynrei ngi la shu ïapher tang ha ki katto-katne ki bynta barit”, ong u Bah Kharkongor.
