Shillong, Naiwieng 21
U MLA ka NPP na Jowai, Bah Wailadmiki Shylla ha ka Sngi Palei u la pyntip shen yn sa sdang noh ban trei ïa ka Ïawmusiang, ka ïew kaba heh tam ha Rilum Jaiñtia kaba la shu ieh kumto khlem lah pyndep shuh mynta la palat arphew snem.
U la ïathuh ba na ka bynta ka jingpyntrei ïa kane ka ïew la mang T.25.60 klur na ka Sorkar Jylla, hadien ba ka tnat DoNER jong ka Sorkar Pdeng ka la pynsangeh shwa ban bei pisa. U la ïathuh ba mynta ka sorkar ka la dep ban khot ‘tender’ bad ki khmih lynti ba ha u snem thymmai yn lah ban sdang noh ïa ka kam bad ban pyndep ruh ha ka por ba la buh.
“Mar ïa jop kum u MLA nga la buddien ïa kane ka projek kaba la pynsangeh noh shiteng na ka jingpyntrei ka JHADC hapoh ka jingbei tyngka na ka tnat DONER. Kumta, nga la kyrpad noh ïa u Myntri Rangbah ka Jylla ban ïarap pisa namar ban phai biang sha ka tnat DONER kan sa nang shim por shuh shuh”, u la ong.
U MLA u la pyntip ruh ba u Myntri Rangbah mardor hi u la kular ban mang na ka jingpynlut ka Jylla T.25 klur tam na bynta ban pyndep ïa ki kam kiba sahteng.
U MLA u la ïathuh ruh ba mynta u la ïakhun ban pynïoh ïa ki surok kiba paka ha ka thaiñ khamtam ïa ka surok bypass kaba rim kaba na Jingkieng Myntdu kaba mih pat sha Lad Kiang Nangbah College kaba la sniew bha.
“La khot tender na bynta katei ka surok bad ïa kiwei ruh, kumba 50 haduh 60 persen ki surok kiba don ha ka konstitwensi jong nga la kynthup lang naduh ka shnong Ïalong, Mukhla, Mirang, ka shnong Salaroh kaba pynïasoh bad ka Mihmyntdu bad kumta ter ter. Ka la don ka song na bynta ban pynbha ïa kine ki surok kaba kot sha ka T.50 klur”, u la ong.
Shuh shuh u la pyntip ba ka jingpyntrei ïa ka tourism centre ruh ka dang ïaid mynta ha Thadlaskeiñ kaba la ïoh ka jingmang pisa kaba haduh T.35 klur naduh u snem ba la dep bad ka kam mynta ka la ïaid shakhmat.
“Ynda la dep katei ka centre ki paidbah kin sa myntoi shibun ha ka ïoh ka kot, ki nongwan jngohkai kin ym sah tang ha Shillong hynrei kin sah ha kitei ki thaiñ bad kin pynlut ïa ka por jong ki ban leit peit kylleng ki jaka jngohkai kiba don ha sawdong ka rilum Jaiñtia”, u la ong.
U Bah Shylla u la ïathuh ruh ba dang shen ka tnat ka Koit ka Khiah ka la wan ban ïakynduh na ka bynta ban ïoh jaka ban shna ïa ka Nursing College ha ka thaiñ namar haduh mynta dei sa tang ka Jaiñtia Hills ka bym pat don ïa ka Nursing School ne ka Nursing College.
“Ryngkat ka jingdonlang u Joint Director ngi la leit lang ban jurip ïa ka jaka ha ka shnong Mukhla bad jied ïa kane ka jaka bad ban phah ïa ka jingtyrwa sha Delhi ban ïoh ïa ka jingmynjur,” u la ong.
U MLA u la ong ruh ba da ka jingdon jong katei ka jaka pule nurse kan ai jingmyntoi shibun ïa ki samla ka thaiñ ha ka pule puthi bad ka ïoh kam ïoh jam.
