Shillong, Naiwieng 22
Ka Ïingbishar Meghalaya High Court ka la bthah ïa ka Committee kaba la thung ban tohkit halor ki jingkynnoh pyrshah ïa u Vice Chancellor ka skulbah NEHU bad kiwei ki jingbymbiang ha ka rukom pynïaid kam hapoh kane ka skulbah ban phah noh ïa ka kaiphod jingtohkit hapoh 15 sngi.
Ïa kane ka hukum la pynmih da ka Ïingbishar Meghalaya High Court kaba kynthup ïa ar ngut ki nongbishar u Chief Justice I.P Mukerji bad u Justice B. Bhattacharjee haba bishar ïa ka mukotduma halor ka jinglong-jingman ha NEHU.
Ka Ïingbishar ka la ong ba kumba ka paw, ka tnat pule- puthi jong ka Sorkar Pdeng na New Delhi kaba la thung da ka committee ban tohkit ïa ki baroh ki jingkynnoh pyrshah ïa u VC bad kito kiwei pat kiba donbynta ban pynïaid kam hapoh jong kane ka skukbah. Kumta la bthah ban ai noh ïa ka kaiphod hapoh ka 15 sngi naduh ba la pynmih ïa ka ha ryngkat ki jingai jingmut. Ka Ïingbishar ka la ong ba ha kane ka por donkam ban ap ïa ka kaiphod jong ka Committee lem bad ki lad ki lynti ban leh eiei noh.
Namar kata, la buhteng shwa ïa kane ka kam bad yn bishar biang ha ka 6 tarik Nohprah.
