Shillong, Naiwieng 22
U Symbud Myntri Rangbah ba khmih ïa ka tnat Pohïing (Police), Bah Prestone Tynsong, u la bthah ïa ka Central Recruitment Board (CRB) ka tnat Meghalaya Police, ba kan pynlong biang da kawei ka eksam pynrung kam pulit kynthup ïa ka Physical Efficiency Test (PET) naduh kaba sdang.
Kane ka jingbthah ka la mih hadien ka jingpynbna jong ka CRB ba la pynsangeh shwa shipor ïa ka eksam PET naduh ka 22 tarik Naiwieng, namar ka jingshem ba ki don ki jingduna ha ki kor (machine) ha ka jingpynlong ïa ka eksam PET ha 1st MLP Battalion, Mawïong bad 4th MLP Battalion ha Sohpian, kiba la long naduh ka 18 tarik haduh 21 tarik mynta u Naiwieng.
“Nga la ong ïa ki ba kan bha shibun ban pynlong biang bad ban leh biang naduh kaba sdang namar ba ka don ka jingthut ha ki kor ba pyndonkam. Nga la bthah ïa ka CRB ba kan pynkynriah shwa, pynsangeh shwa mynta bad ban pynlong pat da kawei”, la ong u Bah Prestone.
U la ong ba ka CRB kan sa pynbeit ïa ka tarik bathymmai kaba lah ban shim por palat shitaïew ne artaïew ei-ei ban lah pynlong biang ïa kane ka eksam.
Nalor kane, u Bah Prestone u la pynthikna ba baroh ki kyrtong kynthup kito kiba la dep ban leh ïa ki ‘test’ ha Mawïong bad Sohpian ba kin hap ban leh biang naduh kaba sdang.
“Ka dei tang na ka daw jong ki tiar ïa kaba hap ban pynbeit bad maramot, shisien ba la dep ïa kata, ngin sa sdang biang ïa ka PET. Kito kiba la dep ban ïashim bynta kin hap ban mareh biang”, u la ong.
