Shillong, Naiwieng 22
Ki bor distrik ka East Khasi Hills ha ka Sngi Thohdieng ki la pyntikna ba kiba bun na ki briew kiba la wan phet rieh sha Shillong namar ka jinglong-jingman ha Manipur, ki la leit phai biang sha ka Jylla lajong ne sha kiwei-kiwei ki bynta jong ka ri.
“Kiba bun na kine ki la mih noh na Shillong bad ngi don hapdeng ka jingïakren na ka por sha ka por bad ki dkhot na ki kynhun seng jong ki jaidbynriew bapher-bapher ha Manipur kiba shong ba sah ha Shillong bad ha kane ka jingïakren jong ngi, ngi la ïoh jingtip ba lait na ki khynnah bad samla kiba dang bteng ïa ka jingpule ha ki jaka pule bapher-bapher ha Shillong (skul bad kolej), kiba bun na ki, ki la leit phai noh – la ka long sha Manipur ne sha kiwei-kiwei ki bynta jong ka ri,” ong u Additional Deputy Commissioner ka distrik, Bah Ronnie Wahlang.
U la ïathuh ruh ba ka ophis ka la lum thup ïa ki jingkheiñ jong ki briew kiba wan na Manipur bad ïa ka thup kyrteng la ïasam lang sha ki thanat bad ophis u Superintendent of Police (SP) ka distrik kumjuh sha ki Dorbar Shnong.
Ka Hynñiewtrep Youths’ Council (HYC) ha ka Sngi Palei ka la ïakynduh ïa ki ophisar ki bor distrik ban pynsngew sha ki halor ka jingdonkam ban lum jingtip halor ka jingdon jong ki poiwir na Manipur kiba wan rung sha ka Jylla. Haba pynkynmaw ïa u snem ba la dep, u Bah Wahlang u la ïathuh ba ki la don bun ngut ki briew na Manipur ki la wan phet rieh sha Shillong ha ki dong bapher-bapher bad na ka liang ka ophis (DC) ka la ïaid shakhmat bad ka jingtohkit bad katkum ka jinglap na ka jingtohkit, la lum ruh ïa ka jingïalang bad ki Dorbar Shnong ha kaba kitei ki briew ki shong ki sah,
Shuh shuh u la bynrap, “Ngi la lap ba ki don palat 300 ngut kiba la wan phet rieh ha ki ïingwai bapher-bapher bad ha ki phyllaw jong ki ïingmane Balang Khristan kiba la pynbiang jaka sah sha ki. Ngi sngewnguh ruh ba ha katei ka por, ki Balang ha ryngkat ki Dorbar Shnong ki la pynbiang jaka sah sha kine ki briew khamtam sha ki ‘riew rangbah, kiba la tymmen bad ki khyllung-khynnah.”
