Shillong, Naiwieng 22
Ka Inter State Bus Terminus (ISBT) kaba don ha Mawlai Mawïong, Shillong kaba la tei ha ka jinglut T.48.31 klur ka lah ban shu kylla ïingjah noh namar ki bos kiba wan na kiwei ki jylla kim shym la poi shuh naduh ba la maramot ïa ka jingkieng Umïam.
Naduh ba la sdang ban maramot ïa ka jingkieng ha Umïam ha u Nohprah 2023 la sdang ban ym shah shuh ban ïaid ïa ki kali heh bad bos kiba wan na kiwei jylla bad la shah ïeng tang haduh ka shlem treikam Fire & Emergency Service, Umïam, Ribhoi district kaba la ïai bteng haduh kine sngi.
Wat la ïa ka jingkieng Umïam la dep ban maramot bad la shah ban ïaid ïa ki kali naduh u Nailar mynta u snem hynrei ka sorkar kam pat shah ban ïaid ïa ki kali heh kum ki trok bad ki bos namar kim pat sngewshngaiñ haba ki dang shu dep maramot. Shuh shuh la ïohi ba ka sorkar ka la pynïeng da ki nar kiba kah lynti ïa ki kali heh ban ïaid lada kiew ne hiar na ka jingkieng ha Umïam.
La ïohi ba ki bos kiba wan na kiwei jylla ki hap ïeng harud surok hajan ka shlem treikam Fire & Emergency Service Umïam kaba la ker ïa ka surok bah khnang ban ym ïatyngkhuh bad ki kali kiba ïaid na surok bah.
Kine ki bos ki wan poi ha ka por mynstep bad ki hap ban leit noh mar shu kem dum namar kane ka jaka ba ki ïeng ha Umïam kam da shngaiñ ha ka por mynmiet.
Ha ka jingbuddien u nonglum khubor la ïohi ba ka jaka ïeng kali ha ISBT ka la kynjah shisha naduh bym wan poi shuh ki bos na kiwei jylla bad ki don satang katto-katne ki bos MTC bad ki kali rit kiba ïeng.
Ka jingkynjah kane jaka ka dei namar ki dukan baroh ki la khang lut bym don shuh ki bos kiba wan ïeng.
Kum ban shu kdew ïa ka ISBT Mawïong la wan plie da u Amit Shah, Myntri ka tnat Pohïing, Cooperation ka Sorkar India uba bat kum u Chairman ka North Eastern Council ha ka 24 tarik Naitung 2021, ha ka jingdonlang u Myntri Rangbah ka Jylla, Conrad K Sangma, u G. Kishan Reddy, Myntri ka DoNER, Bah Prestone Tynsong kum u Symbud Myntri Rangbah ka Jylla bad Bah Sniawbhalang Dhar, Myntri ka Sorkar Jylla jong ka tnat Transport.
Haba phai pat ha kawei ka khubor, ka sorkar ka la sdang ban shna da kawei ka surok kaba thymmai ban pynpoi ïa ki bos sha ka ISBT kata ban ïaid na Mawlai Bypass hajan ka lad kaba don hajan jingkieng bad madan Futsal ban poi shaduh Nongtraw, Bhoirymbong, Ribhoi District.
Ha ka jingjurip u nonglum khubor, la ïohi ba kane surok ka la ïaid shaid shaid ka kam kaba ïaid lyngba ka shnong Umsaw ban poi sha Nongtraw.
Katkum ka jingthoh ba la pynïeng hakhmat ka surok lada ïaid na Mawlai Bypass, kane ka surok la thoh ka jingshna ïa ka surok na Shillong City sha Umroi Airport ha jingjngai 14 kilometre kaba la bei pisa da ka North East Special Infrastructure Development Scheme kaba la mang pisa ha ka jinglut T.34 klur.
Ïa kane ka surok la sdang trei naduh ka 5 tarik Jymmang 2023. Ka thong ban pyndep ka long haduh ka 5 tarik Jymmang 2025 kaba hap hapoh ka jingkhmih jong u Executive Engineer PWD (Roads) Umsning Division kaba la pyntrei pat da ka company M/S Abhoy Charan Bakshi, Purba medinipur (West Bangla).
Katkum ka jingbatai kiba pynïaid ïa kane ka surok ki la pyntip ba ka jingtrei ka la ïaid palat 50 percent bad ki don jingkyrmen ba ïa kane ka surok yn pyndep katkum ba la buh ka por na bynta ka jingmyntoi jong ki paidbah.
