Shillong, Nailar 02
U President ka Voice of the People Party (VPP) Bah Ardent Miller Basaiawmoit u la ong, ba ka public hearing ka dei na ka bynta ban sngap ïa ka sur u paidbah hynrei ka jingpynlong ïa ka public hearing ha Lum Syrman, kam dei kata kaba ka Sorkar ka kwah ban tip shisha ïa ka sur u paidbah, hynrei ka dei tang ka jingpyndep rukom.
Haba kren sha ki lad pathai khubor, u Bah Ardent u la ong, ba ki paidbah kiba leit sha katei ka public hearing ka dei kaba ka Sorkar ka la dep pynbeit lypa.
“Ka VPP ka pynrem jur ïa kane ka jingleh bad ka jingpyndonkam da ka bor ïa ki nongshong shnong. Aiu ka Sorkar kan leh ïa kiba pynjulor ïa ka surok ba ki paidbah kim shym lah shuh ban leit sha ka public hearing,” u la ong.
“Kane ka jingwan ki kompeni cement sha ka Jylla jong ngi, kam shym la wanrah ka jingmyntoi eiei. U MP jong ngi, kata u (L) Dr. Ricky AJ Syngkon, u la dep ban thoh sha u Myntri ka Sorkar Pdeng, uba khmih ïa ka Environment and Forest Climate Change, halor ka jingpynjot mariang ki kompeni ha ka Jylla. Kum ka party ngi la leh katba ngi lah la ka bor, hynrei kane ka Sorkar mynta ka thaw da ki buit ki lynti kumno ban pynïaid shakhmat ïa kine ki kam,” ong u Bah Ardent.
U ong, haba ka Sorkar ka sngewthuh ba kadei ka kam ba khuid, ka la dei ban sngap ïa ka jingpyrshah ki paidbah, hynrei u ong ba kane ka Sorkar ba mynta, ka pynbeit bad pynkhreh pynban, ban khñiot ïa ka sur pyrshah halor ka public hearing.
“Kane kadei kawei ka mat, ka ban kynthup lang ha ka jingmih paidbah jong ngi ban ker tawiar ïa ka Secretariat,” u la bynrap.
“Kaba mut aiu ban ong ‘public hearing’, haba ong public hearing, kadei ban sngap ïa ka sur u paidbah, kaba u paidbah u don aiu ban pynpaw, bad lada ka Sorkar ka don shisha ka jingkitkhlieh, kan sngap ïa ka sur u paidbah, hynrei ha kane ka public hearing ngi ïohi ba ka Sorkar kam shym la sngap, hynrei kadei tang ka jingpyndep rukom” ong u Bah Ardent haba jubab halor ka jingbym shah ban rung ïa ki paidbah ba pyrshah ha ka public hearing.
Shuh shuh u la ong, ba kane ka Sorkar ba mynta kadei ka Sorkar ka bym pyrkhat ïa u paidbah, kam pyrkhat ïa u rit u ria, hynrei kadei ka Sorkar kaba pyrkhat beit tang ïa ki heh spah bad khamtam eh kadei ka Sorkar kaba long pyrshah ïa ki trai ri trai muluk.
