Shillong, Nailar 02
Ki pulit na Meghalaya bad kiba haïing hasem ki la leit sha Bangalore ban leit wad ïa u Kwis Sumer uba dang 23 snem ka rta uba la jah naduh ka 13 tarik Naitung 2026.
Naduh ba jah, haduh mynta ka sngi ka 2 tarik Nailar 2026 ka la long 20 sngi hynrei ym shym la lap dien shuh ïa une u samla wat haba ki pulit na Bangalore ki la wad ïa u.
Haba ïakren bad u samla Donlang Nong-phut uba dei u President ka Khasi Student Union (KSU) Bangalore Unit u la ïathuh ba uwei u pulit IPS na Shillong u OC na Muktapur bad ar ngut kiba haïing kiba dei na ka jait Sumer ki la wan poi sha Bangalore ha ka 30 tarik mynshem bnai.
U la ïathuh ba kine ki pulit ki la leit ïakynduh ïa u DGP, IGP jong ka jylla Karnataka ban pan jingïarap ban wad ïa une u samla uba la jah.
Shuh shuh u la ïathuh ba ki dkhot ka KSU ki la leit synran ïa ki pulit na Meghalaya haba ki leit wad jingtip na ki pulit ka Tumpur district kaba jngai kumba lai kynta lada shong rel na Bangalore.
U la pyntip ruh ba ki pulit Meghalaya bad kiba haïing ki la mih na Bangalore mynta ka sngi U Blei ba kin leit phai noh sha Meghalaya.
“Haduh mynta ngi khlem ïoh jingtip eiei naduh ba u jah ha ka miet jong ka 13 tarik u bnai ba la dep. Ngi la ïoh jingtip ba u Kwis u la leit tied kumba lai tylli ki ïing ha Tumpur district hadien ba la mih ki trai ïing u la tieng u la phet klumar,” u la ong.
U la ïathuh ba ha ka jingtieng u Kwis u la rynsied na phyllaw ïing ki briew bad la hap ka mobile phone bad ka tiket rel.
Kumta ki paidbah ki la leit aiti ïa kane ka phone bad ka tiket rel sha ki pulit.
U la pynkynmaw ba u Kwis u leit bylla sha Bangalore ka dei lyngba ka jingpynwad kam u Sanu Lamare uba dei na kajuh ka shnong na Muktapur, West Jaiñtia Hills uba la don lypa sha Karnataka u la batai da ka phone ban shong rel na Bangalore kaba jngai haduh 9 kynta hynrei ym tip na kaei ka daw ba u Kwis u la hiar noh shiteng lynti.
U la pyntip ba une u samla na Muktapur u dei uba la wan bylla teng kham mynshwa ha Tamil Nadu u la kham tip ïa ka leit ka wan haba u shong rel hynrei um tip na kaei ka daw ba u jah lynti haba u wan sha Bangalore. Kumban shu pynkynmaw na ka liang ka kmie jong u Kwis ha ka 15 tarik mynta u bnai ka la leit ujor da ka ejahar sha ki pulit ka Muktapur Police Patrol Post ban pyntip ba u khun u la jah ha Bangalore naduh ka 13 tarik Naitung.
