Shillong, Nailar 02
Ka Court and Office of District and Session Judge, East Khasi Hills District ha ka janmiet jong ka 01 tarik u Nailar, 2026, ka la ai hukum pyn -ngat 14 sngi ha ka Judicial Custody ïa saw ngut ki dkhot ka Hyn-ñiewtrep National Youth Front (HNYF).
Kane ka hukum ka la mih hadien ba la tian bishar ïa ki saw ngut ha khmat ka Ïing Kashari hadien ka jingshah kem jong ki, ha ka miet ba la dep.
Lah ban kdew ba ka jingshah kem ki dkhot ka HNYF, kadei namar ka jingpynïaid kjat ryngkat ka pynbat kti ha shkor ïa u wei u nongïasaid-aiñ, uba la shah kdew donkti, ba u la jrong kti ïa ka samla pule law, kaba leh intership bad u.
Ka jingkem ka la wan hadien ba ki durkhih ne ki video kiba la saphriang ha ki rynsan social media, ki pyni ba ïa u nongïasaid aiñ, la pyniaid da ka kjat ha ki dkhot ka HNYF, lyngba ki bynta bapher-bapher jong ka Shillong sha Sadar Police Station, myn ha ka janmiet jong ka 28 tarik u Naitung, 2026.
Kum ban shu kdew ba kane ka samla pule Law kaba leh Internship bad u tei u nongïasaid aiñ, ka la pyntip sha ki dkhot ka HNYF ha ka janmiet ka 28 tarik u Naitung, 2026, da kaba ïathuh ba ka la shah jrong kti ha u tei u nongïasaid-aiñ.
Kumta ki dkhot ka HNYF ki la leit sha Chamber u tei u nongïasaid-aiñ, bad hadien ki la ïalam da kaba pynïaid kjat ïa u sha Sadar Police Station, ha kaba katei ka samla ka la buh da ka ejahar ha katei hi ka janmiet.
Ka tyllong khubor na ki pulit ka ïathuh, ba ki saw ngut kiba la shah kem, ki kynthup ïa u Bah Steve Khyriem, u Bah Tyllibor Swer, u Bah Jeff Sohtun bad u Bah Kit Ryngkhlem.
