Shillong, Nailar 02
Ka Confederation of Meghalaya Social Organizations (CoMSO) ka pynrem jur ïa ka jingleh palat pud ki pulit, ha kaba ki la kem ïa ki nongïalam bad ki dkhot jong ka Jaiñtia National Council (JNC), ryngkat bad kiwei pat ki riew paidbah, kiba la ïeng pyrshah da ïa ka jingthmu ban tih mawshun ïa ka Shree cement, ha Lum Syrman, Daistong, East Jaiñtia Hills.
Ha ka kyrwoh ba la phah da u Chairman ka CoMSO, kata u Bah Roy Kupar Synrem u la ong ba ki jingjia la sakhi ha kine ki khyndiat sngi ba la dep, ki pynpaw ïa ka jinglong kaba pynkulmar jingmut, ha kaba ka Jylla ka paw ba ka kham sngewtynnad ban ïada ïa ki jingmyntoi jong ki kompeni, ban ïa kaba ïada ïa ka hok synshar paidbah jong ki nongshong shnong, trai ri trai muluk.
“Haba ki nongrep, ki trai jaka, ki nongshong shnong bad ki sengbhalang, ki pynpaw ïa ki jingsngewkhia kiba shisha halor ka lawei jong ka jaka, ka mariang bad ka jingim jong ki, ka jubab jong ki bor synshar kadei ban long ka jingïakren-ym ka jingpyntieng, ka jingpyndonkam bakla ïa ka bor ki pulit,” u la ong.
“Ym lah ban pdiang ba ïa kito kiba wad ban pyndonkam ïa ka hok riti synshar jong ki ban pynpaw ïa ki jingeh jong ki, hynrei la ñiew ïa ki kum ki nongpynkheiñ aiñ. Kum kine ki jingleh ki pynduh ïa ka jingshaniah jong ki paidbah ha ka synshar bad ki buh jingartatien kaba khraw ïa ka jingkular jong ka Sorkar haba ïadei bad ka jingsynshar paidbah,” u la bynrap.
Ka COMSO ka ïeng ha ka jingïatylli kaba khlem artatien bad ka JNC bad u wei pa u wei u briew, uba la pyrshah da ka jingjai jai ïa kane ka projek.
