Shillong, Nailar 02
Ka Aakash Educational Services Limited (AESL) kawei na ki synjuk kaba kyntiew ïa ka pule puthi ha India ka la pynbna artylli ki sienjam na ka bynta ka nongbah Shillong ba ka la plie ïa ka Centre ha ka Jylla Meghalaya bad ka la ïasoi ruh ïa ka Memorandum of Understanding (MoU) bad ka tnad shipai Assam Rifles.
Ka Centre ba thymmai jong ka AESL ka don ha Shillong ha Don Bosco Square, Upland Road, pyrshah ka St Margarets H.S. School, Nongkynrih, Laitumkhrah, kaba dei ruh ka sien nyngkong ba kane ka kompeni kan don ïa ka shlem ha ka Jylla bad ka la nang kyntiew shuh-shuh ïa ki Coaching Centre ha North-East, kane ka Centre thymmai ka don 6 tylli ki kamra klas bad palat 300 ngut ki khynnah pule.
Ka AESL ka la don lypa khyndai tylli ki Centre ha North-East kiba don ha nongbah Agartala (Tripura), Dimapur (Nagaland), Imphal (Manipur) bad Guwahati, Kamrup, Nagaon, Silchar, Jorhat bad Dibrugarh (Assam).
Da kane ka jingdon kane ka Centre ha Shillong kan ai jingmyntoi ïa ki khynnah pule kiba kwah ïoh jinghikai ban ïakhun ïa ka NEET, IIT-JEE bad kiwei pat ki eksam doktor lane Engineer khlem da donkam shuh ban leit sha kiwei pat ki nongbah ban pynkhreh ïa kine ki jait eksam.
Ka AESL ka pynbna ruh ïa ka jingïatreilang jong ka bad ka Assam Rifles ban seng ïa ka rukom treikam ba la buh ryntih jong ka jingbha jingmiat ha ka pule puthi ha kylleng ka thaiñ, kaba ai ïa ki prokram ai jinghikai ba la shna kyrpang, ka jingpyllait ïa ka bai skul bad ka jingkyrshan ba aiti lut ha ka pule puthi na ka bynta ki shipai jong ka Assam Rifles bad ki bahaïing jong ki.
Ha kane ka sngi, u Chandra Sekhar Garissa Reddy, MD & CEO ka Aakash Educational Services Limited u la ong, “Ka jingplie ïa ka Centre ba nyngkong ha Meghalaya ka dei u Mawjam ba kongsan ban pynthikna ba ka jingpynkhreh ïa ki eksam kan long kaba suk ban ïoh na ka bynta ki samla pule jong kane ka thaiñ. Ryngkat ka Aakash, ngi ngeit ban kyntiew ïa ka jinghikai na bynta ki samla pule ha kano-kano ka jaka ba ki don. Ka jingïapher ba kongsan jong ngi kam dei tang ka jingbha jong ki jingdon jong ka jinghikai, hynrei ka jingpynpoi jong ka ruh kaba pyni ïa ka jingïahap kaba dei hapdeng ki rukom treikam online bad offline” u la ong.
Shuh-shuh u la ong, ka jingmyntoi kaba khraw jong ka Centre ka long ba ka jinghikai ba pawnam ha ka pyrthei ka la don hajan ki samla kim donkam shuh ban leit sha jngai, “Ngi sngewkmen ban soi ïa ka MoU bad ka Assam Rifles. Kito kiba shakri ïa ka jaidbynriew ki dei hok ban ïoh ïa ka lad ïa ka longïing jong ki. Ka long ka lad kaba rit, hynrei kaba don jingmut ban noh synñiang ban kyrshan ïa ki shipai jong ngi” u la ong.
Ka AESL ka don ïa ka jingïadei ha ka Ri India baroh kawei kaba don 415 tam ki jaka pule kiba don palat 400,000 ngut ki samla pule kiba la pynrung kyrteng, ka la tei ïa ka kyrdan ba khlaiñ ha kine ki 37 tylli ki snem, ka dei ruh ka bynta jong ka Manipal Education and Medical Group (MEMG), ka kynhun ba pawkhmat ka India ha ka jingdon ki jaka pule bad ki jaka ba ai jingsumar ïa kiba pang ba shitom.
