Shillong, Nailar 02
Ka kynhun jong ki nonghikai hapoh ka skulbah North-Eastern Hill University (NEHUTA) ka la pynpaw ba ka don ka jingkyrmen ba u Vice-Chancellor (VC) u ban wan thymmai un long uba biang, u ban don ka jingsngewkhia bad uba don ka jingkitkhieh ban trei na ka bynta ka jingbit jingbiang jong Skulbah.
Haba ïakren ïa u President ka NEHUTA u Prof. Lakhon Kma u la pynpaw ba ka jingïoh ïa u VC ba pura jong ka skulbah kam dei ban slem than, hynrei ïa kaba mynta hi ka Ministri ka dang donkam ban thung ïa u Convener jong ka Search-cum Selection Committee bad ban sdang ban peit ïa ki kot ki sla ki kyrtong ba long bit ban long VC. “La kumno-kumno hapoh 6 bnai ngi dei ban ïoh noh ïa u VC ba pura hapoh jong ka Skulbah” u la ong.
“Ngi na ka liang ka NEHUTA ngi la ïeng skhem ba ngin dawa ba ngin ïoh beit u VC u biang, u lah ban dei mano-mano ruh, tangba u dei ban long u VC u ba don ka jingïadei, ka jingsngew ïa ki khynnah pule ka NEHU bad ki nong Meghalaya ki dei ban ïohkam ïoh jam” la ong u Prof. Kma.
Shuh-shuh u Prof. Kma u la pynpaw ba ka NEHU ka la mat ïa ki VC kiba sniew ha kine ki 11 snem, kata hynriew snem u Prof. S. K. Srivastava bad san snem u Prof. Prabha Shankar Shukla, kaba la pynlong ïa ka Skulbah ban hiar kat haduh ba ka NEHU ka la jan kylla long kum ka jaka theh ñuit.
U Prof. Kma u la pynpaw ruh ba lada ha ka sien kaba lai ruh ki bor ba dei peit ki ai biang da u VC ba sniew, u la ong ba ki kynhun bapher-bapher kiba don hapoh ka Skulbah kin nym pdiang, “Khamtam ba ngi la ïohi ïa u Shukla, ba ka huri hura hadien ba u don ar snem ha NEHU, hynrei ïa u ban wan lei, lada ngi ïohi ba briew u ba wan nabar u wan hangne tang ban myntoi ïalade bad ïa ki briew jongu, ïa u ba kum uta u briew ngin ym pdiang” la ong u Prof. Kma.
Namar kata u la pynpaw ba ka khynun ki nonghikai kumjuh baroh ki kynhun kiba don hapoh ka Skulbah ki don ka jingkyrmen ba ha ka sien kaba lai ka NEHU kan ïoh da u VC uba biang uba don ka jingkitkhlieh ban pynbha bad ban pynïaid beit ïa ki kam jong ka Skulbah.
Haba bynrap u la ong bun kiba kwah ban long VC hapoh jong ka NEHU, hynrei mano ba bit tam ban long VC, ym pat lah ban tip bad ki kynhun kiba don hapoh ka NEHU ki kyrmen ba u ban wan thymmai un long u ba bit tam eh bad uba ki kynhun baroh ki lah ban pynïadei.
