Dawa u MLA ban pynphai noh ïa ka T.1.25 klur ba pyndonkam bakla u MLA barim ka Mawsynram

Shillong, Naiwieng 23

Tang khyndiat hadien ba la shah kynthoh ha u MLA barim u Bah Himalaya Muktan Shangpliang, u MLA ka Mawsynram u Bah Olan Sing Suiñ u la sei madan syndon ïa ka Office Memorandum ha kaba ïadei bad ka jingpyndonkam ïa ka pisa kaba la mang na ka bynta ka MLA skhim ha ki konstitwensi bapher bapher bad u la dawa na ka tnat pynroi nongkyndong ban pynlong ka jingtohkit bad leh ei ei ïa kito kiba pyndonkam bakla ïa ka pisa kumba T.1.25 klur bad ka tnat pynroi nongkyndong ka dei ruh ban pynïoh biang ïa katei ka pisa kaba la aibor khlem nongrim da u MLA barim ban pyndonkam ïa ka lyngba u BDO ka Mawsynram Block.

Haba ki lad pathai khubor ha ka Sngi Thohdieng ki wad jingtip kham bniah na u MLA ka Mawsynram konstitwensi u Bah Olan Sing Suiñ halor ka jingpyndonkam bakla ïa ka pisa jong ka MLA skhim SRWP, bad halor ka jingpyntreikam ïa ka Office Memorandum da ka Sorkar Jylla, une u MLA u la sei ïa ka Office Memorandum ban pynshai ïa ka rukom pyntreikam ïa ka skhim SRWP bad rukom pyndonkam ïa ka pisa.

U la ïathuh ba ka Office Memorandum kaba 14 tarik Nailar, 2023 ka la kren shai ba kino-kino ki ‘work order’ jong ka SRWP kaba dang sahteng ha ka por jong ki MLA kiba la rem ilekshon noh ne khlad noh bad khlem pat sdang ban pyntrei, ki BDO ki dei ban phah noh ïa ka pisa sha ki Deputy Commissioner bad ki Deputy Commissioner ki hap phah ïa ka pisa sha u Director ka tnat Community and Rural Development.

Kumjuh ki Deputy Commissioner lada kim pat mang pisa ban pyntrei ïa ki skhim, ïa ka pisa dei ban phah noh sha u Director ka tnat Community and Rural Development.

U la ong ba katkum kane ka Office Memorandum, ym lah ban pyndonkam ïa ka pisa wat ki MLA kiba shahjied thymmai.

Hynrei u Bah Suiñ u la ong ba ka long kaba lyngngoh ba u MLA barim ka Mawsynram hadien shi snem saw bnai ba la rem ïa ka ilekshon MLA, u la pyndonkam ïa ka pisa kaba T.1.25 klur jong ka MLA skhim kaba dang sahteng jong u snem 2022-2023 ha ryngkat u BDO ka Mawsynram da kaba ai ‘work order’ thymmai bad pyllait pisa syndon ha kajuh ka sngi, kata, ha ka 5 tarik Naitung, 2024.

U la ong ba kane ka dei ka jingpynkheiñ ïa ka Office Memorandum jong ka Sorkar bad u dawa ban tohkit bniah ïa kane ka jingleh bym dei jong u MLA barim ka Mawsynram.

U Bah Suiñ u la ïathuh ruh ha ka 7 tarik Naiwieng, 2024 la phah shithi sha u kum u MLA uba mynta ban pyndonkam ïa ka pisa jong ka MLA skhim kaba dang sahteng jong u snem 2022-2023, hynrei nangno un ïoh ban pyntreikam ïa ka skhim haba u MLA barim u la dep pyndonkam lut da kaba leh beaiñ.

“Nga la thoh sha ka tnat Community and Rural Development ba dei ban pynphai noh ïa ka pisa T.1.25 klur bad pynshitom ïa kito kiba donkti ban pyndonkam bakla,” la ong u Bah Suiñ.

U la ong ba kane ka dei ka kam jong u bad ka ophis u BDO bad kito kiba donkti hynrei kam dei ka jingpyrshah ïano-ïano ne kano-kano ka seng.