Nongpoh, Naiwieng 22
Ki spah ngut ki paidbah jong ka shnong Umpher, Matchogre bad Amphang -gre ha ryngkat ki kynhun seng ba kynthup ïa ka Khasi Students’ Union (KSU), Ri-Bhoi Youth Federation (RBYF), Fede -ration of Khasi Jaiñtia & Garo People (FKJGP), Byrnihat Women Society (BWS), Garo Students Union, Ri-Bhoi Regional Unit lem bad ki khynnah skul ka thaiñ ha ka Sngi Thohdieng ki la pynlong ïa ka jingïaid paidbah ban pyrshah jur halor ka jingthmu ba sop-sop ka Sorkar Jylla ban pynkylla ïa ki khlaw kiba da ki spah akar jong ka CTI sha ka ktem jong ki karkhana lane ka ‘Industrial Estate’.
Kane ka jingïaid paidbah ka la sdang na Ïing Dorbar jong ka shnong Umpher ter-ter shaduh ophis treikam jong ka Conservation Training Institute (CTI) Byrnihat.
Ha kane ka sngi, la ïohi ba ki paidbah nongshong shnong jong kitei ki lai tylli ki shnong hapoh ka lama jong ka Joint Action Committee (JAC) ha ryngkat ki seng bapher-bapher bad ki khynnah skul, kum ka dak jong ka jingpyrshah, ki la rah ruh ïa ki jingthoh (placard) pynrem jur ïa ka Sorkar Jylla bad ruh ban ym ailad ba kitei ki jaka kiba dang dap da ki khlaw ba rben kin kylla long kum ki ktem jong ki karkhana kiba pynmih ïa ka lyer jaboh bad buh ïa ki paidbah nongshong ha ka jingeh, naba tang mynta ruh ki la hap ban ring mynsiem lypa da ka lyer jaboh.
Kumba ka Byrnihat ka dei kaba la don lypa shibun ki karkhana bad kaba la pawnam ruh kum kawei na ki jaka kaba jur eh jong ka jingjaboh ka lyer ha ri India, ka jingthmu ban pynkylla biang sa ïa katei ka khlaw CTI kum ka ktem Karkhana ka la nang pynbitar bad pynlong ïa ki paidbah katei ka thaiñ ba kin ïakhun dohïap ban ym ailad ba kane ka jingthmu jong ka Sorkar kan urlong.
Ki nongkren ha kane ka sngi kiba kynthup naduh ki nongïalam shnong, ki nongïalam seng bapher-bapher bad ruh na ka liang jong ki longkmie, ki la pynpaw shai ba ka Sorkar ka dei ban pyrkhat arsien halor katei ka mat, namar na ka liang jong ki, ka kyrwoh kaba shai sha ka Sorkar ka long ba kin ym ailad da lei-lei ruh ban pynkylla ïa katei ka khlaw CTI sha ka jaka jong ki karkhana (Industrial Estate), namar kim kwah shuh ba ka Byrnihat kan ïoh pat sa kawei ka nam kaba nyngkong, kata kum ka jaka ba jaboh tam ka lyer ha ka pyrthei.
Kitei ki nongkren ki la pynpaw ruh kumba long mynta, katei ka khlaw CTI ka dei kaba ai jingtngen bad pynkhuid ïa ka lyer jaboh lyngba ka jingdon jong ki dieng ki siej bad ka khlaw kaba rben bad khamtam eh kaba don ruh ïa ki tyllong umbam-umdih jong kitei ki shnong kiba mar syndah bad pynpaw ba lada pynkylla ri shyiap noh ïa katei ka jaka da kaba wanrah da ki karkhana, kan long ka jingtim kaba khraw ïa ki paidbah nongshong shnong kiba mynta bad khamtam ïa ki pateng ki ban sa wan.
Kitei ki nongïalam ki la pynrem jur ruh ïa u Myntri Rangbah ka Jylla, u Conrad K. Sangma halor katei ka jingthmu ba sop-sop ban aiti noh ïa katei ka khlaw sha ka Invest Meghalaya Authority (IMA) ban pynkylla kum ka ktem jong ki karkhana khlem ka jingtip bad ka jingtwad jingmut shuwa na ki paidbah bad dawa ba u dei ban pynsangeh mardor ïa katei ka jingthmu lym kumta u hap hi ban shim ka jingbahkhlieh lada mih kino-kino ki jingjia ki bym sngewtynnad.
