Shillong, Naiwieng 22
Hadien ka jingap kaba 10 sngi naduh ba la pyndep ïa ka jingthep ‘vote’ ha ka 13 tarik, ki paidbah ka Gambegre konstitwensi bad ki bor pynïaid ilekshon kin pynbna mano ban mihkhmat ïa ka konstitwensi sha ka Ïingdorbar Thawaiñ ka Jylla hadien ka jingñiew ïa ki ‘vote’ ha ka Sngi Saitjaiñ.
Ka jingñiew ‘vote’ kan long ha Tura bad kan sdang ha ka por 8 baje mynstep hapdeng ka jingpyrkhing bha ki bor pahara.
Ka jingpahara kan long kumba shi pyrton ki pulit Central Armed Police Force (CAPF) kiba dei ki CRPF bad shi pyrton ki pulit ka Jylla lane State Armed Police Force (SAPF).
Ka jingñiew kan ïaid haduh saw wat bad kin don 14 tylli ki miej ñiew ‘vote’ hapoh ka jaka ñiew ‘vote’.
Ka Gambegre konstitwensi ka la sah thylli khlem MLA hadien ba u MP ka Tura, u Saleng A Sangma u la iehnoh kum u MLA ha ka 10 tarik u Jylliew mynta u snem.
Ka jingpoi ki nongthep ‘vote’ ha ka ilekshon shiteng samoi ha Gambegre ka long 90.93%. Ka rukom pahara ha kane ka sngi ñiew ‘vote’ kan long ha ki lai syrtap, kata shi kynhun kin pahara kham jngai na ka jaka ñiew ‘vote’, shi kynhun ha khyrdop ban rung shapoh ka jaka ñiew ‘vote’ bad shi kynhun pat kin don hapoh ka jaka ñiew ‘vote’.
Mano ban long nongjop ban mihkhmat ïa ka Gambegre konstitwensi sha Ïingdorbar Thawaiñ ka Jylla yn sa tip shai ynda la dep ban ñiew ïa ki ‘vote’.
Ha kane ka ilekshon shiteng samoi, ka jingïakhun ka long kaba jwat bad ka dei ruh ka jingïakhun na ka bynta ka burom khamtam eh ïa ka NPP bad ka Congress.
Ka Congress ka dei ban jop khnang ban bat biang ïa ka Gambegre konstitwensi kaba la ju mihkhmat da u MLA ka Congress u Saleng A Sangma uba la long mynta u MP ka Tura, katba ka NPP ka hap ban jop ïa kane ka ilekshon kum ka seng kaba don ha ka bor synshar, khamtam haba ka pynïakhun da ka kurim jong u Myntri Rangbah ka Dr. Chandee A Sangma kum ka kyrtong.
Ka Congress ka pynïakhun da u Jingjang M Marak kum u kyrtong bad ka TMC ka pynïakhun da ka Sadhiarani Sangma kaba dei ka kyrtong jong ka All India Trinamool Congress (AITC) bad kaba dei ruh ka hep kynsi jong u Dr Mukul Sangma uba dei u nongïalam ka Liang Pyrshah ha Ïingdorbar Thawaiñ ka Jylla bad ruh u Myntri Rangbah barim ka Jylla. Kiwei pat ki kyrtong ki long u Bernard N Marak jong ka BJP uba dei ruh u MDC, nalor ar ngut ki kyrtong shimet u Sengkrabirth M Marak bad u Jerry A Sangma.
