Shillong, Naiwieng 22
U Myntri Rangbah ka Jylla, u Conrad K Sangma u la pynbna ba ka Sorkar kan wanrah noh da ka Standard Operating Procedure (SOP) kiba pyrkhing halor ka jingpyndonkam ïa ki siren, tah ïit ïong bad pyndait ïa ki jingshai thaba halor ki kali, khnang ban ym ktah eh ïa ki paidbah.
“Nga la ïohpdiang shibun ki jingujor bad ki jingbynñiaw na ki nongshong shnong halor kata kaba ki ong ka ‘VIP Culture’. Ka dei ka kam kaba sngewkhia, hynrei ngi hap ruh ban peit na kiba bun ki liang. Ka don ka jingsngewkhia ha ka ban ïada bad ban ai jingshngaiñ, ka bym dei ban pynïakhleh bad kata ka bym dei ban leh”, u la ong.
U la ong ba ka jingshngaiñ bad jingïada ka dei kawei ka kam kaba u sngew ka long kongsan bad ka bym dei ban ïapeiñ. Hynrei lada ka kylla long pynban kum ka jingpyni rongphong bad la pyndonkam ha ka rukom ka bym dei, ka dei shisha ka jingeh kaba hap ban pynbeit da kaba teh kyndon.
U Myntri Rangbah u la pyntip ruh ba ha ka taïew ba la dep, u la khot ïa ka jingïalang ha kaba la don lang u Symbud Myntri Rangbah ba khmih ïa ka kam pohïing (Police) Bah Prestone Tynsong, Chief Secretary, Bah DP Wahlang bad ka Director General of Police (DGP) Kong Idashisha Nongrang, ha kaba la bthah ïa ka tnat Pulit ba kan pynkhreh ïa ka SOP kaba lah ban batai mano kita kiba lah bad ki bym lah ban pyndonkam ïa ki siren, ban tah ïit ïong bad pyndait ïa ki jingshai thaba bun rong.
“Ngin sa wanrah ïa ka SOP ba pyrkhing bha ha kaba ïadei bad kita kiba lah bad ki bym lah ban pyndonkam ïa ki siren, tah ïit ïong bad pyndait ïa ki jingshai thaba halor ki kali, hangno ki lah ban pyndonkam bad kumno ki dei ban pyndonkam”, la ong u Conrad.
Ha kajuh ka por u la ong ba ka kam ba ïadei bad ka jingshngaiñ bad jingïada ruh ka dei ka mat ba hap ban khmih bha, namar ki don ki kyndon kiba hap bud ïa kito ki heh ki haiñ kiba hap ha ki kyrdan bapher-bapher kum ka Z Plus, Z bad Y ba donkam ban ïada bad ki bym lah ban ïapeiñ.
“Da kaba buh hakhmat eh ïa ka jingshngaiñ bad jingïada, ngi hap ban khmih ruh ban pynthikna ba ym dei ban pyndonkam bakla ïa ka, ka ban long pat ka jingpyndik ïa u paidbah. Ka jingpynbiang tarajur ïa kine baroh ar bynta ka long kaba donkam”, la ong u Myntri Rangbah.
Ka jingdawa pynduh ïa ka jinglong kyrpang lane ka ‘VIP Culture’ ka la jur bha na kiba bun balang hapoh ka Jylla, khamtam hadien ka jingkhlad noh jong uwei u samla ha surok Shillong Bypass hajan ICAR ha ka janmiet 15 tarik mynta u bnai ha ka lynti ba u dang leit sha Cherry Blossom Festival, ha kaba la kynnoh ba utei u samla u la khlad hadien ba ka kali pulit ba synran ïa u Myntri Sorkar ka la rat ïa ka ar shaka jong u haduh ba un da khlad hashen, katba ka kali kaba rat ka la ïaid beit.
