Shillong, Naiwieng 22
Ki pulit ka South West Garo Hills (SWGH) ki la ïoh kem sa 5 ngut ki nong Bangladesh kiba la rung be-aiñ sha ka distrik ha ka jingkhynra kaba la jia ha ka miet 21 tarik mynta u bnai.
Katkum ka kyrwoh khubor, la ong ba ki pulit ka Zikzak Police Patrol Post hapoh ka jingïalam u SI – Diganta Hajong ki la bat ïa kawei ka kali kaba kit ïa 5 ngut ki briew ba suba nong Bangladesh.
Kane ka jingkhynra ka la long ha ka por ba talasi ïa ki kali ha SH-12 hajan ka skul KGBV, Zikzak, ha ka por kumba 11:42 baje mynmiet.
“Katei ka kali kaba dei ka Bolero Pick-Up (AS-34C-0613) la ñiah da u Md. Nur Hussain (40 snem ka rta), nongshong shnong ka Nandia, South Salmara District, Assam. Hadien ka jingtalasi, la lap ba 5 ngut ki briew ba shong hapoh kali ki don ïa ki kot ki sla kiba suba ba dei kiba thok, kynthup ïa 5 tylli ki ‘Aadhaar’, 2 tylli ki ‘mobile phone’ kiba don ka ‘Sim Card’ ‘Airtel’ (India), bad ki tiar kiba dei na Bangladesh kum ki dawai khmut bad ka ‘Lorix Cream’,” ong ka kyrwoh.
Ki pulit ki la pynpaw ba ha ka jingpynshisha banyngkong da kaba pyndonkam da ka ‘mAadhaar App’, la lap ba ki ‘Aadhaar Card’ ki long ki bym biang bad ki lah ruh ban dei kiba thok. Ha ka jingtohkit, kitei ki briew ki la pdiang ba ki la rung be-aiñ sha India lyngba ka khappud India-Bangladesh hajan Baghmara, South Garo Hills bad pynsngew ïa ka jingthmu jong ki ban leit sha Kolkata bad ban trei kum ki nongbylla.
Kine ki nong Bangladesh kiba la shah kem la tip kyrteng kum u Md. Jahangir Ali (21 snem ka rta), Md. Jaidul Islam (30 snem ka rta), u Md. Durul Ali (37 snem ka rta), Md. Maruf Ali (19 snem ka rta), bad Md. Babu Sheikh (22 snem ka rta). Kine baroh ki dei na Char Sikhalipur, Chapai Nawabganj, Rajshahi, Bangladesh.
Ha kawei ka liang, u heh pulit ka South West Garo Hills, u Vikash Kumar u la pyntikna ba la ujor mukotduma ha Mahendraganj PS case u/s 336(3)BNS R/w sec 14A(b) Foreigners Act, bad ka jingtohkit ka dang ïaid shakhmat. Baroh ki tiar kiba la kurup, la shimti ha ka jingdonlang ki sakhi laitluid.
U Kumar u la ong ba katei ka jingpynsangeh ïa ka kali ka dei shi bynta jong ka jingpyrshang kaba dang ïaid ban khanglad ïa ka jingwan buhai shnong be-aiñ lyngba ka khappud India-Bangladesh.
“Ha kine lai bnai ba la dep, ki la don 27 ngut ki nong Bangladesh kiba la shah kem ha South West Garo Hills. Ngi ïatreilang bad ki BSF bad kiwei ki tnad ban pynkhlaiñ ïa ka jingpahara ha khappud. Ka jingkyrshan jong ki nongshong shnong ka la long ka atiar ban pyntip ïa ki kam kiba i don jingsuba,” u la bynrap.
Katkum ka jingong u Kumar, la pynjur ïa ki rukom peitngor ha ka distrik ban ïada na ka jingjam be-aiñ na shiliang sha shiliang bad ban pyntikna ïa ka jingshngaiñ jong ka thaiñ, hadien kiba kum kine ki jingjia.
