Shillong, Naiwieng 22
Ki nongdie madan kiba don hapoh Shillong ha ka Sngi Thohdieng ki la leit tur paidbah sha ka shlem treikam jong ka Shillong Municipal Board (SMB) ban pan jingshai halor ka jingthmu ban pynkynriah ïa kumba 200 ngut ki nongdie madan na Khyndailad sha 3 tylli ki jaka ba ka Sorkar ka la dep ban ithuh.
Kane ka kynhun jong ki nongdie madan hapoh ka jingïalam ka President jong ka Meghalaya & Greater Shillong Progressive Hawkers and Street Vendors Association (MGSPHSVA) Kong Biolin Pyrtuh ka la ïakynduh ïa u Executive Engineer (EE) ka SMB, Bah FB Chyne ban pan jingpynshai halor ka jingkren u Myntri ka tnat Jngohkai, Bah Paul Lyngdoh ba ka Sorkar ka la pynkhreh ban pynkynriah noh ïa ki nongdie madan kiba shong dukan naduh Motphran haduh Khyndailad hapoh ka 25 tarik mynta u Naiwieng.
Lah ban kdew ba ka Sorkar Jylla ka la pynkhreh ban pynkynriah noh ïa ki nongdie madan na Khyndailad sha kawei ka jaka ha thaiñ surok Jail Road shwa ban kut u Naiwieng. Na ka liang u Bah Paul Lyngdoh u la ong ba ha kane ka kynti ka sorkar kan leh da kaba tyngeh namar ba ka la dep ban pynbiang ïa ki jingdonkam baroh ban pynkynriah noh ïa ki 200 ngut tam ki nongdie madan sha kawei ka jaka katkum ka jingpynskhem ka Town Vending Committee.
Ka Kong Biolin Pyrtuh ka la ong ba u Myntri u tip bha ba ka don ka Committee, kaba la thaw ban khmih ïa kane ka kam bad ki nongdie madan ruh ki dei ki dkhot ka Committee.
“Ngi kwah ruh ïa u (Bah Paul) ban tip ba lada u kwah ban long u nongshong dukan madan, ngi pdiang ïa u ban wan. Ngin da kmen eh ban ai jaka lem ïa u”, ka la ong.
Ka la ong shuh shuh ba ki nongdie madan kim dei ban sheptieng, hynrei ban shaniah ïa kiba dei ki dkhot ka Committee ki ban sa shim rai ïa ki jaka ban pynlong jaka shong dukan madan, bad ka la kyntu ïa baroh ki nongdie madan ba kin leit phai biang sha la ki jong ki kam.
Haba kylli, ka Nongïalam ki nongdie madan ka la ïathuh ba ka SMB kam don jingtip halor kane ka jingthmu jong ka Sorkar bad kam don jingtip ruh halor ki 200 ngut ki nongshong dukan madan ba kren da u Myntri. Ka la ïathuh ba ki don palat 5000 ngut ki nongdie madan kiba la dep pynrung kyrteng bad ka Synjuk.
Ha ka jingshisha, ka Sorkar mynta la bun tylli ki snem ka la pyrshang ban weng noh ïa ki nongdie madan na lynti ïaid bad ki surok ha ka thaiñ Khyndailad kaba la pynisih bad pynthut ïa ka ïaid ka ïeng jong ki paidbah nongleit nongwan kumjuh ki kali, khamtam ïa kiba wan kai na shabar ban ïohi ïa ka jinglong lymmuh-lymmaiñ bad ka jingjaboh. Pynban katba nang mih ki sngi kine ki nongdie madan ki la nang kharoi haduh bym ithuh-ithaw shuh.
