Shillong, Naiwieng 24
Ki Khasi kiba shong ba sah ha ki 73 tylli shnong kiba don ha ri Bangladesh ki la ïoh ban ïashim bynta ha ka jingrakhe Seng Kut Snem 2024 kaba 125 snem kaba la long ha ka 23 tarik u Naiwieng ha shnong Magurcherra Khasi Punjee kaba don ha ka District Moulvibazaar bad Kamalgang Sub Division.
Ïa kane ka jingrakhe la pynlong da ka Khasi Social Council (KSC) kiba la pynlong ruh shibun ki jingïakop tang ki Khasi kiba wan ïashim bynta naduh ki kynthei bad shynrang.
Ha kine ki prokram la buh ruh ka jingïakop Siat Khnam, Siat Batur, Kynshew Tympew, ki jingrwai ki jingshad tynrai, ka jingkiew siej bad kiwei kiwei.
Ïa kane ka prokram la pynïaid da u Chairman ka Council uba dei ruh u Rangbah Shnong, Bah Gidison P Suchiang.
Kaba kham shongkun shuh shuh ha kane ka jingrakhe ka dei na ka jingïadonlang u SP ka Moulvibazaar District u MKH Jahangir Hussain PPM, u Additional Deputy Commissioner u Md Abdul Salam, u Executive Magistrate u Sawon Majumder, Kamalgang Sub-division Assistant Commissioner (Land) DM Sadik Al Safin kiba long kum nongshah khot sngewbha.
Nalor kine ki ophisar rangbah ka ri Bangladesh, la ïadon ruh ki ‘riew rangbah jong ki Khasi kiba sah ha Bangladesh naduh u General Secretary ka Khasi Social Council (KSC) uba dei ha kajuh ka por u Rangbah Shnong jong ka Lawacherra Khasi Punjee u Bah Phila Pohthmi, ki dkhot jong ka Council (KSC) u Bah Onil Joy Dkhar, Kong Monica Khonglah bad u OC jong ka thanat Kamalganj u Shamin Akhonji.
Ka jingrakhe ki Khasi ha Bangladesh ïa ka Seng Kut Snem ka long ban pynneh-pynsah ïa ka riti dustur u Khasi kumba ki Khasi kiba sah ha Meghalaya ki la rakhe ha kane ka sngi ka 23 tarik Naiwieng 2024 da kaba ki la ïaid kjat naduh madan Ïewrynghep, Fire Brigade shaduh madan Lympung Weiking kaba don ha Jaïaw.
Ïa ki dur bad ki dur-khih haba ki Khasi ki la ïoh ban rakhe ïa ka Seng Kut Snem la shon bad ring dur da u Bah Saju Marchiang.
