Shillong, Naiwieng 24
Ka Synjuk ki Seng Samla Shnong Pynthorumkhrah Pyllun (SSSPP) kaba kynthup ïa ki 4 tylli ki shnong kita ka Lumshyiap, Golflink, Pynthorbah bad ka Langkyrding Mihsngi ha ryngkat ka Seng Samla Mawlai Mawroh ha ka 23 tarik u Naiwieng 2024, ki la leit ban ïakynduh ïa u Bah Hector Marweiñ uba dei u Director ka Shillong Golf Club ha kaba ïadei bad ka jingbym ïohlad shuh jong ki nongshong-shnong ban rung ne ïalehkai ha madan saw kaba la ker pynban da ki sainar kaba don mar pyrshah ka madan Golflink.
Na ka liang u Chairman ka Synjuk, u samla Khrawpyrkhat Mynsong u la ong ba ha ka jingshisha katei ka madan saw ka dei ba la ai sngewbha da ka Shillong Golf Club bad ka Assam Rifles ha u snem 2005 sha saw tylli ki shnong ha kaba wat u mawnongrim ban pynshisha ïa ka jinglong trai jong saw tylli ki shnong ruh la pynïeng ha katei ka jaka.
Da kaba pynkynmaw ruh ba katei ka madan ka dei ka madan kaba ki khynnah samla jong ki shnong ki ju smat bha ban ïalehkai ïa ki jait jingïalehkai bapher-bapher hynrei mynta pat ka la paw ka jingleh donbor da kaba knieh bad ker sainar ïa katei ka madan.
“Wat la u mawnongrim u dang don hynrei ki khlem bat pat ïa ka nongrim bad u mawnongrim u la long tang kum u mawnongrim khlem ka jingbat skhem ïa ki nongrim ba ki la ïakren”, ong u samla Khrawpyrkhat.
Utei u samla u la ong ruh ba nalor ka jingker sainar da ka Shillong Golf Club ïa katei ka jaka hynrei ka la buh ruh ïa ka jaka khrong tiket ban ïoh rung shapoh katei ka jaka.
Halor kane ka bynta, na ka liang utei u samla u la pynpaw ba ha ka jingïakren bad u Director ka Shillong Golf Club, u la pyntikna ba yn sa ai da ki kynja ‘pass’ sha baroh ki nongshong-shnong kiba don ha saw tylli ki shnong khnang ba kin ïoh ban rung khlem da donkam ban siew eiei hapoh katei ka madan saw.
Kumta, kum ka Synjuk ka la dawa ïa u Director jong ka Shillong Golf Club ban weng noh mardor ïa ka jaka khrong tiket bad ban pyllait paidbah ïa ki nongshong shnong ba kin ïoh rung laitluid ban pyndonkam ïa katei ka jaka.
Na ka liang ka Synjuk ka la buh ruh ïa ka jingmaham ba lada u Director ka Shillong Golf Club um shimkhia ïa ka jingdawa ka Synjuk hapoh ka shitaïew kan sa shim noh da ki sienjam kiba kham tyngeh.
“Lada kim lah ban ai hapoh ka shitaïew, ki don da kiwei pat ki sienjam ba ngin sa pyntip pat”, ong u samla Khrawpyrkhat.
