Shillong, Naiwieng 24
Ka Kynhun rwai ba la rim tam jong ka Jylla Niam Bah Shillong, ka St. Cecilia Choir ka la rakhe ïa u mawmer ba Shispah Snem naduh ba la seng ïa ka ha u snem 1924 da u Sohblei, Elias Hopewell Elias Kharïong Sohliya uba dei ruh u Phadar banyngkong napdeng ki Khasi.
Kum shi bynta ban rakhe ïa une u mawmer ki 100 tylli ki snem jong ka St. Cecilia Choir, ka la don ka nguh ka dem ïa u Blei da ka Mass Bakhuid ba la pynmynta da u Bishop Wilbert Marweiñ, Bishop ka Jylla Niam Nongstoiñ ha Ïingmane Bah Shnat Niam Laitumkhrah.
Ha katei ka Mass Bakhuid, la synran lang da u Sohblei Bernard Laloo, Parish Priest ka Ïingmane Bah, u Sohblei Robert Majaw, u Sohblei Hilarious Lamare, Parish Priest ka Shnat Niam Marian, Jowai bad kiwei ki Lyngdoh Sohblei.
U Bishop Wilbert Marweiñ haba ai jingkren ha ka lyngkhuh pynkut ïa ka 100 snem, u la ïathuh halor ka jingkyrkhu ïa ka mynta bad ka jingjynjar jong ka mynnor.
Ha ka Mass Bakhuid, ka St. Cecilia Choir ka la rwai pynshit rhem da ki jingrwai jong ka sha ki paid u Blei kiba la wan ban sngap.
Hadien ka Mass Bakhuid, u Bishop Wilbert Marweiñ u la pyllait paidbah ïa ka kot sahkynmaw tympang bad ka jinglehburom.
Ha kajuh ka por, la ïa kyrtiang dien ïa ka mynnor jong ka kynhun rwai Cecilia naduh ba ka St. Cecilia Choir ka dei ka kynhun rwai banyngkong eh jong ka Balang Katholik hapoh ka Shillong Archdiocese.
La seng ïa ka ha u snem 1924 ha u Lum Tyngkong (kaba don mynta ka Ïingmane Bah bad ka Grotto). Ïa kane ka kynhun rwai, la seng hapoh ka jingïalam jong u samla H. Elias Kharïong ryngkat bad u Bah Leonidas bad kiwei-kiwei. Ki la ai nam ha ka Cecilia Bakhuid kaba dei ka Nongda jong ki nongput-nongtem ïa kane ka kynhun rwai kaba la tip kum ka St. Cecilia Choir.
Ka jingsdang ïa kane ka Choir ka la long hadien ka jingsdang ka Salesian ïa ka mishon ha kane ka Jylla Niam ha u snem 1922 ha kaba u Most Rev. Louis Mathias, SDB DD, u la long u nongpeit nongkhmih ïa ka Jylla Niam hadien ba la ïa ieh noh ka Salvation na ki daw jong ka Thma.
Ka khana pateng ka ong ba la sdang ïa ka Choir da u samla H. Elias ha ka por ba u dang long tang u khynnah samla.
Ha u snem 1948, u Parish Priest ka Ïingmane Bah, Fr. Foglia, u Choir Master dei u Bah Severine Wilfred Nongkhlaw, Bah Cyril D. Lyngdoh bad Bah Martin Khongwir.
Ha ki snem 1950 ter-ter haduh 1981, ki Choir Master ki long u Fr. Tarsisius Resto Phanrang, Bam Kwai ha Ïing u Blei, u Fr. Robert Majaw u shimti ban pynïaid naduh u 1982 haduh 1984 naduh u 1989 haduh 2013, u Bah Polycarpus Ksoo ba la khlad noh mynta, la shimti da u Samla Damien Jeffrey Jyrwa naduh u 2017 haduh mynta 2024.
Haduh ka St. Cecilia Choir, ka dang don ki ‘riewdkhot barim kiba dei naduh u snem 1958 kiba dang im haduh mynta.
Ha u snem 1990 da ka Jingwan jong ka Senteneri 100 snem ka jingngeit ha Ri-lum Khasi, ka St. Cecilia Choir ka la long ka jingkyndit thiah ban pynkha biang sa shisien kane ka kynhun rwai ka la plung biang ha ka 15 tarik u Naitung.
Kumta ha ka 9 tarik u Naiwieng ka la don ka jingpynkut ïa ka Senteneri 100 snem ka kynhun rwai Cecilia ka la rwai ha ka Proseshon Bah Ïukharist. Ka kynhun rwai kaba la rim tam ha ka Jylla Niam Bah Shillong bad ha ka Thaiñ Shatei Lam Mihngi ka Ri India ka “Saint Cecilia Choir” kaba la ju leit rwai kylleng ka Thaiñ Shatei Lam Mihngi kum ha Arunachal, kata ha u snem 1992, ha ka Centanary Tyrna, ha Pynursla bad kiwei ki jaka shaduh Bangladesh ha Dhaka.
Dang 10 snem mynshuwa, ka St. Cecilia ka la rakhe ïa jingdap 90 snem ha ka 22 tarik u bnai Naiwieng, 2015 ha Ïingmane Bah bad mynta kane ka kynhun rwai ka la kiew sted da ka don jong ka Shlem jinghikai ïa ki khynnah rit ban bteng ïa ka longdien ha ka jingïalam u President Bah M.D. Tmar bad Choir Master, u samla Damian J. Jyrwa bad Spiritual Director, u Sohblei Bernard Laloo.
La pynkut noh ïa ka Sentineri 100 da ka jingpynhiar Lama da u Archbishop Victor Lyngdoh – shuwa ïa katei, la pynlong ïa ka prokram pynkut burom jong ki nongïalam, ki ‘riewdkhot barim bad bathymmai bad ka jingainam ïa u synñiang ba ki dkhot barim ki la noh bad bud da ka jingkyrkhu na u Archbishop.
