Shillong, Naiwieng 24
Ka Estimate Committee jong ka Ïingdorbar Thaw Aiñ ka Jylla ha ka Sngi Thohdieng, ka la hiar jurip ïa ki projek bapher bapher ha nongbah Shillong, kiba hap hapoh ka Shillong Smart City Project kaba kot ka jingpynlut haduh T.487 klur.
Kane ka Committee kaba lamkhmat da u MLA ka Nongpoh, Bah Mayralborn Syiem kum u Chairman ka la hiar jurip ïa ka Ïew Shyllong ha Laitumkhrah, ka Office cum Automated Multi-Level Car Parking ha Mawkhar, ka Shillong Business-cum-Tourism Cultural Centre ha Khyndailad bad ka surok ha Lachumiere bad kiwei kiwei.
Ka Committee ka la shong bishar ïa ka jingïaid ka jingpyntrei ïa ka Ïew Municipal ha Laitumkhrah kaba la pyntrei ha ka jinglut kaba long T. 28.84 klur. La bishar ruh ïa ka jingshna ïa ki Smart Road ha kylleng ki jaka ka Sor, kiba thmu ban pynjanai ïa ki lad pynïasoh bad pynduna ïa ka jingkhapngiah.
Ka Committee ka la leit ruh ban peit ïa ka Office cum Automated Multi-level Car Parking ha Mawkhar, ka projek kaba la pynwandur ban weng ïa ki jingduna jaka pynïeng kali ha Shillong. Hadien kane la jurip ruh ïa ka Commercial Complex ba la shna ha Polo ha ka jingmang pisa ba T.100.33 klur, kaba la khmih lynti ban kyntiew bha ïa ka ïoh ka kot.
Ha Khyndailad ka Committee ka la bishar ïa ka jingpyntrei ïa ka Shillong Business-cum-Tourism and Cultural Centre kaba la mang T.211 klur bad pynkut pat da ka jingleit jurip ïa ka Rainwater Harvesting System kiba la shna ha kylleng ki jaka ka sor Shillong ban tyngkai ïa ka um slap.
Hadien ba la dep ka jingjurip, na ka liang u Chairman ka Committee u la pynpaw ïa ka jinghun jong ka jingïaid ki kam, bad u la kubur ïa ki jingeh ba la mad da ki tnat ba pyntrei ïa kine ki projek kynthup ka jingpynkynriah ïa ki dukan bad kiwei kiwei.
“Ki kam ki la ïaid ha ka lynti kaba dei ban ai ka jingmyntoi kaba khraw ïa ki paidbah ka Shillong”, la ong u Bah Mayral.
U la ïathuh ba ki don ki projek kiba la jan dep artat kum ka ïew ha Polo, kaba sah sa tang 20 percent bad don kiba dang kham shim por namar kiba bun ki daw hynrei kyrmen ba yn pyndep katkum ka por ba la buh.
Ha kajuh ka por u la ong ba ka jingshna ïa ki surok ha sor Shillong ka kham jwat namar ba ka ktah ïa ka jingsahkut kali ba shyrkhei kum ha ka thaiñ Umsohsun bad ha Khyndaidad.
Kiwei ki dkhot ka Committee kiba la don lang ha kane ka jingjurip ki long u MLA ka North Shillong, Bah Adelbert Nongrum, u MLA ka Rambrai-Jyrngam, u Remington Gabil Momin, u MLA ka Jowai, Bah Wailadmiki Shylla, ka MLA ka Ampati, Miani D Shira lem bad ki Ophisar ka Assembly Secretariat, ki ophisar na ka tnat Pynroi Sor bad ka tnat PWD (Roads).
