Shillong, Naiwieng 24
Ka Sorkar Jylla ka la thung ïa ka ‘Special Committee’ ban khmih bniah biang halor ka Meghalaya Minor Minerals Concession Rules (MMMCR) 2016, na ka bynta ban pynjem ha ka ban ïoh ïa ki laisen tih marpoh khyndew bad ban ïoh jingbit ban don ïa ki par.
U Symbud Myntri Rangbah ka Jylla, Bah Prestone Tynsong u la ong ba ha ka jingïalang ba kyrpang kaba la thung da ka tnat Khlaw, ka don ïa ka thong ban khmih bniah biang ïa ki kyndon hapoh ka MMMCR, namar hapoh ka Mines and Minerals (Development and Regulation) (MMDR) Act, 1957, ki kynthup ruh ïa ki marpoh khyndew kum u maw bad u shyiap, kumta ka sorkar ka la ithuh ïa katei ka committee ban shim khia ïa ki mat.
“Ngi la dep ban pynbeit ban pynlong biang ïa katei ka jingïalang bad ki tnat bapher-bapher kiba kynthup ïa ka Forest, Mining bad Geology bad Law, la bthah ba kin khmih bniah shuh shuh ïa kitei kiba la don lypa ban lap ïa ki bynta ba ngin lah ban pynsuk shuh-shuh”, u la ong.
Halor ka jingkylli ba ka don ka jingtih maw be-aiñ ha ka jylla, u Symbud Myntri Rangbah u la pynïasoh ïa kane bad ka jingeh kaba mih na ka rukom ai laisen.
“Ki kam be-aiñ ki la jia ha ki shnong kiba don ïa u shyiap ne par maw, namar ki mad ïa ki jingeh ban ïaid lyngba ka lynti kaba jrong ban ïoh ïa ka laisen ne ka jingbit jong ki par maw. Ïa kane ka Committee la bthah ba kan pynsuk ïa ki kam ki jam, ban pynthikna ba ki nongtih maw ne shyiap kiba rit kin sngewthuh kumno ban aplai ïa ka Mining Lease ne Quarry Permit”, u la ong.
