Shillong, Naiwieng 25
Ki pulit jong ka Rari OGC ha ka 24 tarik mynta u bnai, ki la ïoh ban kurup noh ïa 2500 tylli ki bitor ba don ki dawai jyrhoh (Phensedyl) bad ruh ban kem noh ïa ki lai ngut ki briew na Assam.
Katkum ka tyllong khubor la ong ba ha ka Sngi U Blei, ha ka por kumba 2.40 eiei, ka kynhun jong ka Rari OGC ka la bat ïa kawei ka kali ba la suba kit ïa ki mar bad jingdih buaid bad la pynlong ïa ka jingkhynra katkum ki kyndon jong ka NDPS Act.
La ong ba ha kane jingkhynra, la ïoh ban kurup noh ïa ki dawai na ki briew ba shong ha katei ka kali, kata haduh 10 pla jong u dawai jyrhoh (Cough Syrup-Phensedyl) ba don haduh 2500 tylli bitor, nalor kane la kurup ki mobile phone bad ruh ïa ka kali kaba don ïa u registration number AS18-AC-6853. Ha kaba ïadei bad kane, la kem noh ïa ki 3 ngut ki briew kiba donkti ha kane ka kam, kiba dei na Assam bad la pynrung ruh ïa ka mukotduma.
