Shillong, Naiwieng 25
Uwei u briew u la duh ei ka pisa palat 99 hajar tyngka na ka shah thok shah shukor ha uwei pat u briew uba la kam ïalade kum u mynnong jong ka ‘Courier Service’
Katkum ka khubor kaba la ïoh na ki pulit la ong ba uwei u briew uba shong ha kawei na ki dong ha nongbah Shillong, u la ai ka jingujor ba ha ka 17 tarik mynta u bnai, u la ïoh pdiang ïa kawei ka phone call bym ithuh satia, ba ïadei bad ka kam ban pynpoi ïa ka ATM card, ha uwei u briew uba la kam ïalade kum u mynnong jong ka ‘Courier Service’, ha kaba u la bthah ïa u ban ‘install’ ïa ka ‘Customer Care App’, na ka bynta ban lah ban pynbiang ïa u UPI registered number, UPI code bad shuh shuh la bthah ba un siew T.2 na ka bynta ka jingpynpoi ïa kane ka tiar.
Shuh shuh la ong ba ha ka 18 tarik mynta u bnai, utei u briew u la phone biang sha une u nongujor bad bthah ba un leh biang kumjuh, kumba u la leh ha ka sngi kaba la dep. Hynrei hadien ba la sngewpher bad suba sniew halor kane, une u nongujor u la leit hi sha Ïing Dak ban leit shim hi da lade ïa ka ATM, bad ha ka por ba u la kyntiew ïa ka passbook pat u la lap ba ka pisa kaba long T.99,995/- la dep ban sei tuh na ka Bank Account ka jong u.
Ha kaba ïadei bad kane, na ka liang jong ki pulit ki dang pynlong ka jingtohkit ban lap ïa ki jingshisha bad kumjuh ïa u briew ba donkti ha kane ka kam thok kam shukor.
