Nongpoh, Naiwieng 25
U MLA jong ka Jirang konstitwensi, Bah Sosthenes Sohtun ha ka Lah Sngi U Blei u la mih shakhmat ban kyntu ïa ka Sorkar Jylla hapoh ka jingïalam jong u Conrad K Sangma ba kan hap ban da khmih bniah bad pynsangeh shwa ïa ka jingthmu ban pynkylla ïa ka khlaw Conservation Training Institute (CTI) Byrnihat kaba dei trai da ka tnat Soil & Water Conservation sha ka ‘Industrial Estate’ kumba ki paidbah ki la mih ban pyrshah ha kine ki khyndiat sngi ba la dep.
U Bah Sosthenes u la ïathuh ba u la dep ban ïakynduh ïa ki nongïalam shnong jong ki thaiñ ba kynthup ïa ka Matchogre, Amphranggre bad Umpher ban ïakren sani halor kane ka mat. Kum u nongmihkhmat uba im ba sah ha kane ka thaiñ, u sngew ba kane ka jingpyrshah jong ki paidbah ka dei kaba shongnia bad kaba don nongrim, da kaba pynpaw ruh kumba ka Byrnihat ka la dei lypa ka sor kaba dap da ka lyer jaboh, ka jingwanrah shuh shuh ïa ki karkhana, kan dang pynjaboh shuh shuh ïa ka lyer kaba la jaboh lypa mynta bad buh ïa ki paidbah ha ka jingeh.
Kum u nongmihkhmat ka thaiñ bad uba la im ruh ha kane ka jaka, u Bah Sosthenes u la ong ba u don ryngkat bad ki paidbah halor kane ka bynta bad pyntip ba na ka liang ka jong u, u la dep ban ai da ka jingthoh bad ïakren bad u Myntri Rangbah ka jylla, u Conrad K Sangma na ka bynta ban kyrpad ba ka Sorkar ka dei ban pynsangeh shwa ïa kane ka jingthmu bad ban da pyrkhat sani bha ba kan ym ktah bad buh jingeh ïa ki paidbah.
U la ong ruh ba kum u nongmihkhmat u don ïa ka jingsngewkhia kaba jur na ka bynta ka koit ka khiah jong ki paidbah bad pyntip ruh ba ha ka jingïakren bad u Myntri Rangbah, u la ai jingmut ba kin rah noh ïa kane ka jingthmu sha ki jaka jong ka Hima Jirang ha ka thaiñ Jirang, kaba na ka liang ki nongïalam katei ka Hima ruh ki la mynjur ban ai ïa ka jaka na ka bynta kane ka jingthmu, kaba na ka liang ka jong u lem bad ki nongïalam ka Hima ruh ki kren shai ba kam dei pat ban don jingktah ïa ka koit ka khiah jong ki paidbah bad kaba khlem pynjaboh ïa ka mariang.
U la pyntip ruh ba na ka liang ka jong u, u dang buddien ïa kane ka mat ban tip shai kiba kum kino ki jait karkhana kiba ka Sorkar ka thmu ban buh, hynrei ka mat kaba kongsan kaba na ka liang ka jong u kum u nongmihkhmat lem bad ki paidbah ki don ïa ka jingsngewkhia, ka long ba lada wanrah ïa kine ki karkhana kiba lehse kin ai jingmyntoi shikatdei ïa ki paidbah ruh, kam dei pat ban don ka jingktah ïa ka mariang bad ka koit ka khiah jong ki paidbah bad ïa kane ka bynta, ka Sorkar ka dei ban buh hakhmat eh.
