Jowai, Naiwieng 25
Bunsien la ju sngew shngaiñ ban thied ïa ki jingbam kiba la sop bad spaiñ bha da ki kompeni shna jingbam bapher bapher. Da ka jingsngew shaniah la thied ruh ïa kine jingbam da kaba peit ïa ki tarik ba la shna bad tarik ba la kut por.
Hynrei mynta kynti, u jingbam uba la sop bad uba dang biang ka por ne u bym pat ‘expired’ pynban ynda la plied ïa ka jingsop bad bam ïa uta u jingbam la lap da ki ksaiñ ki khñiang ha ka jingbym poi pyrkhat satia.
Ïa kane ka jingjia la shem da ka Kong Rita Suchiang na ka shnong Thadmuthlong-C Phar-mer, West Jaiñtia Hills District hadien ba ka la thied ïa u Oat Choco Cereal & Milk Bar ha ka 25 tarik Naiwieng.
Ka shnong Thadmuthlong ne ka Phramer kumba kham tip paidbah ka long ka shnong kaba don ha ka surokbah National Highway 6 bad ka shnong kaba khatduh jong ka West Jaiñtia Hills District shwa ban poi sha ka East Jaiñtia Hills District. Haba ïathuh halor kane ka jingjia, ka Kong Rita Suchiang bad Ma AC Suchiang ki la ong ba une u jingbam ‘Oat Choco Cereal & Milk Bar’ u dei uba ki bang bha ban bam baroh shi ïing naduh ki khynnah haduh kiba la heh.
Ka la ïathuh ba ïa une u jingbam la thied da ki khynnah na kawei ka dukan marjan kaba don ha Thadmuthlong-C Pharmer. Ka Kong Rita haba ka la bam ïa une u jingbam kynsan ka la ïohsngew ba don ki kynja ba khih hapoh ka shyntur hynrei ynda haba ka la khlei bad lap pynban da ki ksaiñ barit ha utei u jingbam ba don ïa ka rong lieh.
Hadien ba la lap ïa ki ksaiñ, na ka liang ka Kong Rita bad Ma AC Suchiang ki la buh ka jingkyrpad sha ki paidbah, ki khynnah bad wat ïa ki kmie ki kpa ba kin long kiba adkar ïa la ki khun na kaba pynthied kulmar ïa ki jait jingbam ba har rukom kiba mih ha kine ki sngi bad ki dei ban da peit bha ha shwa ba kin ai sha ki khun.
