Shillong, Naiwieng 25
U Saleng A Sangma uba dei u MP ka Congress na Tura haba pynpaw ïa ka jingbynñiaw, u la ong ba ka Delhi kam kheiñ snep satia ïa kino-kino ki jingjia ha ka thaiñ Shatei Lam-Mihngi (NE) ne ïa ka ïap ka im jong ki paidbah ka thaiñ.
Halor kane, u la kyntu ïa baroh ki Myntri Rangbah bad ki MP jong ka North East ban ïatylli kawei na ka bynta ban lah ban pynsngew ïa ki mat kiba ktah kum ka kynrum-kynram ha skulbah North Eastern Hill University (NEHU) bad kumjuh ka jingïakynad ïaumsnam ha jylla Manipur.
Haba kren sha ki lad pathai khubor, u Saleng u la ong haba peit ïa ka jinglong jingman jong ka thaiñ Shatei Lam-Mihngi, i kumba ka Sorkar Pdeng na Delhi kam pushe ne kheiñ snep eiei ïa ka jingjia ha thaiñ Shatei Lam-Mihngi bad ïa ki paidbah ka thaiñ.
U Saleng u la ong ba ïa kane ka jingleh bym kheiñ snep jong ka Sorkar Pdeng, la sakhi ruh na ka jingjia ha ka jylla Manipur ha kaba ki briew ki la ïap da ki spah hynrei ka Sorkar Pdeng ka leh mynthi bad kumjuh ha kaba ïadei bad ka kynrum-kynram hapoh ka skulbah NEHU ha kaba ka leh bym salia eiei. U la ong ba ka la dei ka por ïa ki MP ka thaiñ Shatei Lam-mihngi ka India ban ïatylli ban pynpei shkor ïa ka Sorkar India.
“Nga la dep ban thoh shithi ha kaba ïadei bad ka jinglong jingman ha NEHU, nalor kiba bun kiwei ki mat. Nga la dep ruh ban ïakren bad khamtam lei ba nga don bynta ha ka Standing Committee Public Grievance bad Law and Justice, kum u Chairman nga la dep ban ïakren ruh bad u Myntri ka tnat Kam Aiñ ka Sorkar Pdeng bad nalor kane, nga la ïakynduh ruh bad ki katto-katne ki MP ka thaiñ Shatei Lam-Mihngi,” la ong u Saleng.
Katkum ka jingïakren bad ïakynduh, ka paw ba ka Delhi kam pushe eiei ïa ki paidbah ka thaiñ Shatei Lam-Mihngi, la phi peit halor ka jingjia ha Manipur ne ka kynrum- kynram hapoh ka skulbah NEHU. Kumta donkam ban ïakren kum kawei ka sur lym kumta yn ym poi shaei-shaei ruh namar ka Delhi kam pushe satia ïa ka thaiñ Shatei Lam-Mihngi, la ong u Saleng.
