Shillong, Naiwieng 25
Uwei u khynnah ba dang 14 snem ka rta, u la duh noh la ka jingim hadien ba la kynnoh ba u la shah thombor ha uwei u rangbah.
Katkum ka khubor kaba la ïoh na ki pulit la ong ba ha ka 21 tarik mynta u bnai, ha ka por kumba 6.35 eiei janmiet, ki pulit ki la ïoh jingtip ba ka la don ka jingïaleh hapdeng uwei u briew ba la tip kyrteng kum u Alamin bad uwei u khynnah 14 snem kaba la jia ha ka shnong Goladigli ha West Garo Hills. Ha ka jingtohkit kaba la pynlong da ki pulit la lap ba ha kane ka jingïaleh, utei u Alamin u la thombor ïa une u khynnah rit da ka khanshi (scissor) bad ban phet bak na katei ka jaka. Namar kane ka jingshah thombor, une u khynnah u la mynsaw jur bad la pynkit noh mar-mar sha CHC ha Phulbari, hynrei na ka liang u Medical Officer ba don ha kane ka por, u la pynbna ba la wanrah ïap lypa ïa une u khynnah.
Hadien kane, ïa ka metïap jong une u khynnah la pynkit noh sha Civil Hospital Tura na ka bynta ban leh ïa ka post mortem. Ka jingtohkit jong ki pulit halor kane ka jingjia, ka la ïaid shakhmat bad ruh ban thwet ïa utei u briew.
