Shillong, Naiwieng 25
Ki kynhun bapher-bapher ka North Eastern Hill University (NEHU) ki la kren shai sha ka komiti tohkit ba la thung da ka tnad pule-puthi ka Sorkar Pdeng ba kim lah shuh ban pdiang ïa u Vice-Chancellor (VC), Prof. Prabha Shankar Shukla (uba don hapdeng ka jingleit shuti), ban wanphai biang sha ka skulbah.
Kum ban shu kdew hangne, ka komiti tohkit jong ki 2 ngut ki dkhot ba la thung da ka tnad pule-puthi ka Sorkar Pdeng ban tohkit halor ki jing-kynnoh bym biang pyrshah ïa u VC kaba la wan poi ha ka Sngi U Blei ka la ïakynduh bad ïakren bad ki kynhun bapher-bapher ka skulbah ba kynthup ïa ka NEHUSU, NEHUTA, NEHUNSA bad kiwei ha ka Lah Sngi U Blei.
Katei ka kynhun ka kynthup ïa u Chairman barim ka UGC, Prof. D.P. Singh (Chairman ka komiti) bad u VC barim ka Assam University, Silchar, Prof. Dilip Chandra Nath (Member).
“Ngi la pynsngew ïa ki jingeh ki samla pule bad ki jingleh donbor jong u (VC) ïa ki nonghikai bad nongtrei (bym dei nonghikai) ha kaba u la shu phah tang ïa ki jingpynbna bapher-bapher hynrei kam shym la don ka jingthung kam ban pynlong na bynta ki nongtrei (bym dei nonghikai),” ong u President ka NEHUSU, samla Sandy Sohtun haba kren sha ki lad pathai khubor.
U la ong ruh ba na ka liang ka seng ka la pynsngew ruh sha ka komiti haba ïadei bad ka jingbym biang ki surok-syngkien, ‘Hostel’, ‘Wi-Fi’ hapoh ka skulbah.
“Ngi la pynsngew ruh sha ka komiti ba ïa une u VC da lei-lei ruh ngim shym la pdiang wat la kane ka komiti ka la wan ban sngap ïa ki jingeh jong ngi – kaei-kaei kaba mih na kane ka komiti, na ka liang jong ngi, da lei-lei ruh ngim pdiang shuh ïa une u VC ban wan ïuh kjat ha kane ka Jylla ne ha kane ka skulbah jong ngi,” u la ong da kaba bynrap ba ka ‘Convocation’ mynta kam shym la long la 3 snem kynthih namar ka jingbym shimkhia u VC.
“U VC u dei uba leh donbor bad um ju ïamir jingmut badno-badno bad u leh hi naduh sdang haduh kut. Naduh bym don ma u, ngi la lap ïa ki kot ki sla kiba pyni ïa ka jingleh donbor jong u hynrei ngi shaniah skhem ha kane ka komiti bad ki kaiphod kiba ngi la aiti. Ngi kyrmen skhem ba ka komiti kan shim ïa ka sienjam ban pynpaw ba une u VC um dei ban don ha kane ka skulbah,” u la ong
Ki samla pule ki la pynsngew ruh sha ka komiti halor ka jinghiar arsut jong ka skulbah, ki jingkynnoh thung kam be-aiñ, ka jingbym biang ki jingdon-jingem hapoh skulbah bad ka jingbym shimkhia jong u VC haba ïadei bad ki kam ki jam.
“Ka jingdawa kaba ngi la dawa naduh ka sngi banyngkong, kata ka jingweng noh ïa u VC – ka jinghun jong ngi kan poi sha ka jingkut tang hadien ba ngi la ïohi ïa ka jingai jingmut na ka komiti, ka sienjam na ka tnad pule-puthi ka Sorkar Pdeng ban weng ïa u,” ong u General Secretary ka NEHUSU, samla Toniho Kharsati.
Ha kajuh ka por, haba ban biang halor katei ka bynta, u President ka NEHUTA, Prof. Lakhon Kma, u la ong, “Katba mih ka kaiphod jong ka jingtohkit, ka jingwan phai biang jong u (VC) shane ngim lah ban pdiang. Wat ka Mawlai Town Dorbar ruh ka la pynbna ba um lah ban wan ïuh kjat ha ka thaiñ Mawlai.”
Shuh shuh u la bynrap, “Kine ruh ngi la pynsngew hakhmat ka kynhun bad haba ngi peit kyllum, ngi la hun naba ngi la lah ban pynsngew ïa baroh kiba ngi dei ban ong bad kdew ïa ka jingbym larkam jong u, ka jingbym shimkhia haba ïadei bad ki kam ka NEHU bad kumno u la ïalam ïa ka skulbah jong ngi sha ka nala ne riat ha kaba ban mih pat ka long kaba jwat bad ka lah ban shim por kumba 10 snem ruh.”
