Shillong, Naiwieng 25
Ka jingshah prong tuh jong ki ïing ki sem, ka jingshah tuh ki arshaka ka la nang ïai bteng na kawei ka sngi sha kawei pat, haduh ba kam don shuh ka jingshngaiñ la ïa ki trai ïing ne trai kali.
Katkum ka khubor na ki pulit la ong ba u Leishingam Shingnaisui u la ai ka jingujor ba ha ka 22 tarik mynta u bnai, ki runar bym lah ban ithuh ki la prong tuh hapoh ka ïing jong u, kaba don ha Demthring Block-II, Shillong bad ban rah tuh ïa kawei ka tyndong lyer shet jingshet, ka baje, ki juti bad uwei u head phone.
Ha kawei pat ka jingjia shah tuh, u Shemborlang Tiewsoh u la ai ka jingujor ba ha ka 22 tarik mynta u bnai, kata hapdeng ka 2.30 haduh 3 baje dang step, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-Z-7902 na ka jaka sah jong u, kaba don ha Mawïong Umjapung, Shillong.
Ha kaba ïadei bad kane, na ka liang jong ki pulit ki dang pynlong ka jingtohkit bad ban thwet ïa ki runar kiba donkti ha kine ki kam tuh kam thiem.
