Shillong, Naiwieng 26
Ki runar bym lah ban ithuh la kynnoh ba ki la ïoh ban rah ei ïa kawei ka trok hadien ba ki la pynap da ka pistol ïa u nongñiah bad nongbud jong kane ka trok ha surokbah NH-6 ha Wahmynso, West Jaiñtia Hills.
Katkum ka khubor kaba la ïoh na ki pulit la ong ba ha ka 23 tarik mynta u bnai, ha ka por kumba 9.30 mynmiet, u Bikash Boro, uba dei u nongñiah jong ka trok kaba don ïa u registration number AS25-DC-9358 ryngkat bad u nongbud jong u, u Bikash Marak, ki la shu pyntip tang da ka ktien ba ki runar bym lah ban ithuh ki la rah jubor ïa ka trok jong ki.
Katkum ka jingïathuh la ong ba kine ki runar ki la wan da kawei ka kali Maruti Wagon R, bad ynda la poi ha surokbah NH-6 ha Wahmynso, ki la khang lynti ïa kane ka trok bad ban rah jubor ïa kane ka trok da kaba pynap da ka pistol. La ïathuh ruh ba kham hadien katto katne por, u nongñiah ryngkat bad u nongbud jong kane ka trok, ki la lait ban phet da ka said.
Shuh shuh la ong ba kham hadien, ïa kane ka trok la lap pat na ka shnong Mookyndur ha West Jaiñtia Hills bad na kane ka trok la lap ba uwei u battery, ka pisa kaba long T.4,500/-, ka bek pisa, ki kot ki sla ba donkam, kawei ka mobile phone, kawei ka jaket bad kiwei kiwei ki tiar ki la jah.
Ha kaba ïadei bad kane, na ka liang jong ki pulit mynta ki dang pynlong ïa ka jingtohkit na ka bynta ban lap ïa ka jingshisha baroh halor kane ka jingjia bad kumjuh ban thwet ïa ki runar kiba la kynnoh donkti ha kane ka kam.
