Shillong, Naiwieng 26
Ka Khun Hynñiewtrep National Awakening Movement (KHNAM) ha ka 26 tarik u Naiwieng 2024 ka la leit ban ïakynduh ha ryngkat ka jingaiti da ka dorkhas ha u Deputy Chief Executive Member (CEM) ka Khasi Hills Autonomous District Council (KHADC) u Bah Pynshngaiñ N Syiem, uba khmih ruh ïa ka tnat Elaka halor ka jingtreikam jong ki jaidbynriew Garo ban long kum ki khlieh nongsynshar lane ki Rangbah Shnong ha ki jaka kiba hap hapoh u pud-u sam jong ka Hima Mylliem bad ka KHADC.
Haba kren sha ki lad pathai khubor hadien ka jingïakynduh ïa u Deputy CEM, u Working President ka KHNAM, Bah Thomas Passah u la ong, ha ki shnong kiba hap hapoh ka Raid Marwet Ribhoi, kiba bun na ki shnong ki dei kiba la synshar da ki jaidbynriew Garo kum ki nongïalam shnong ha kaba kane ka long kum ka jingpynkheiñ ïa ka ‘Appointment and Succession of Syiem, Deputy Syiem, Electors and Rangbah Shnong of Mylliem Syiemship, Act 2007’.
U Bah Thomas u la ong ba ki shnong kiba hap hapoh ka Raid Marwet bad kiba la kylla long nongsynshar shnong pat da ki jaidbynriew Garo ki kynthup ïa ka shnong Maikhuli, Pillangkaata A, Ïongkhuli, Mawïong, Gambalbari, Jyrmang, Jolsyiem, Rangsakona, Chibra, Nongspung A and Nongspung C.
“Kane ka long beit im-im peit-peit ba la pynkheiñ ïa ka ‘Appointment and Succession of Syiem, Deputy Syiem, Electors and Rangbah Shnong of Mylliem Syiemship, Act 2007,” ong u Bah Thomas.
U Bah Thomas u la ong ba katkum katei ka aiñ la thoh shai kdar ba tang u Khasi uba lah ban long u Rangbah Shnong bad ong ba da ka jingkam Rangbah Shnong jong ki jaidbynriew Garo, ka don ruh ka jingïadie-jingïathied jaka hapdeng ki bym dei ki jaidbynriew Khasi kaba long pat ka jingpynkheiñ ïa ka ‘Land Transfer Act, 1971’.
Halor kine ar tylli ki bynta ba kongsan, ka seng ka la dawa ba ka tnat ka dei ban leh eiei halor kane da kaba shim da ki lynti bad sienjam kiba tyngeh pyrshah ïa kitei ki briew kiba la kam ïalade kum ki Rangbah Shnong.
U la ong ruh ba ha ka jingïakren bad u Bah Pynshngaiñ, la sngewthuh shai ruh ba ki don ki shnong shathie ki bym don shuh ïa ki nongshong shnong Khasi hynrei na ka liang u Bah Thomas u la bynrap da kaba ong ba ka aiñ ka khlem thoh ba lada ym don nongshong shnong Khasi, un ïoh long nongïalam shnong noh da uwei u jaidbynriew.
“Na ka liang jong ngi, ngi la ai jingmut ba lada um don shuh uta u nongshong shnong Khasi ha kine ki shnong, la dei ban thung noh da u Myntri na ka Hima ba un treikam kum uta u Rangbah Shnong”, bynrap u Bah Thomas.
Shuh-shuh u la ong ruh ba ka seng ka la ai jingmut ïa u Bah Pynshngaiñ ba ka tnat ka dei ban lum jingkheiñ ïa ka jingïadie-jingïathied jaka ha kine ki shnong hapoh ki 5 snem kiba la dep khnang ban lap ba mano ba la die ïa ki jaka bad shano la die bad ban ïoh bat pat ïa ki briew kiba pynkheiñ ïa ka aiñ ‘Land Transfer Act, 1971’.
U la ong ba ka seng ka la ai jingmut ruh ba na ka liang ka Hima Mylliem ka dei ban phah da ka jingthoh sha u Deputy Commissioner (DC) ka Ribhoi District ban pyntip ïa ka jingithuh jong ka Hima ïa kino-kino ki Rangbah Shnong.
“Kino-kino ki briew kiba soi ïa ki kot-ki sla kiba dei bad ki kot khyndew, u DC ka Ribhoi um dei ban pynsngap ïa kum kine ki briew namar ka lah ban don ka jingïalam bakla”, ong u Bah Thomas.
U Bah Pynshngaiñ u la ong ba un sa pan ïa ka jingkheiñ-jingdiah na ka Hima Mylliem naduh ki kyrteng jong ki shnong, ki Rangbah Shnong bad kumjuh ka kaiphod halor ka jingdon ka jingïadie-ïathied ïa ki jaka-ki puta ha ki 5 snem kiba la dep.
