Shillong, Naiwieng 26
U Myntri ka Sorkar Jylla, Bah A.L Hek u la lamkhmat ïa ka kynhun jong ka BJP na Meghalaya bad ïakynduh ïa u Myntri ka tnat pule puthi ka Sorkar Pdeng u Dharmen-dra Pradhan bad ïa u Myntri khynnah, u Sukanta Majumdar. Kane ka kynhun ka la pynsngew ha kine ki Myntri ka Sorkar Pdeng ba donkam ban thung noh kloi da uwei u Vice Chancellor ka skulbah North Eastern Hill University (NEHU) khnang ban lah pynbeit noh ïa ki jingeh bad lait na kiei-kiei ki jingjia bym sngewtynnad.
Ki nongïalam ka BJP Meghalaya kiba la leit lang bad u Bah Hek ki long u nongaiktien ka BJP Bah M. Kharkrang, u Executive Member, Bah David Kharsati bad u General Secretary Bah Everest Myrsing ha kaba ki la aiti ïa ka jingthoh kaba batai ïa ka jinglong jingman hapoh ka skulbah bad ki jingeh kiba ïakynduh.
Ki la pynpaw ruh ïa ki jingpynsngew jong ki samla pule, ki nonghikai bad ki nongtrei jong ka skulbah halor ka jingbym shah ïa u Vice Chancellor ban wan nalor ka jingsdang ka jingtohkit da ka Committee kaba don ar ngut ki ophisar ban tohkit halor ki jingkynnoh pyrshah ïa u Vice Chancellor, Prof. Prabha Shankar Shukla.
Haba ïakren bad u Bah Hek u la ïathuh ba ka kynhun jong ka BJP Meghalaya ka la wan khnang sha Delhi ban pynsngew ïa kaei kaba la dep pynpaw da ki samla pule bad ki nonghikai bad nongtrei ka NEHU ha kaba la pynsngew ha ki Myntri ka Sorkar Pdeng ba donkam ban pynbeit noh ïa ki jingeh kiba la mad da ki samla pule bad ki nonghikai ha kaba la donkam ban phah leit shuti noh kham jlan ïa u Vice Chancellor bad dei ban ïoh noh da uwei u Vice Chancellor uba pdiang lut lang da baroh.
Shuh shuh u Bah Hek u la ong ruh ba ka la don ruh ka jingmana ban wan u Vice Chancellor uba mynta ha NEHU na ka thaiñ Mawlai katba ka NEHU ruh ka don ha Mawlai. Kumta ka long kaba donkam ban pynbeit noh na ka bynta ka jingbha lang jong baroh bad khnang ban lait na kiei-kiei ki bym sngewtynnad ka bha ba wanrah noh da uwei u briew ban shimti kum u Vice Chancellor ka skulbah NEHU.
Na ka liang u Bah Kharkrang u la ong ba ki Myntri ka Sorkar Pdeng ki ka pyntip ba ka Sorkar Pdeng kan khmih ïa kane ka jingeh bad kam don kano-kano kaba la kular ban lehnoh mynta mynta namar hap ban ap ruh ïa ka kaiphod jingtohkit bad pule bniah ha shwa ban shim ïa ka rai namar ka Sorkar Pdeng ka la thung ïa ka Committee ban tohkit ha kaba ïadei bad ki jingeh bad kynrum kynram kiba la mih ha skulbah NEHU.
Ka kynhun BJP ka la ïakynduh nyngkong ïa u Myntri khynnah u Sukanta Majumdar ha ka por nohphai sngi bad kham hadien ynda la kham miet, ka kynhun ka la ïoh ruh ban ïakren bad u Dharmendra Pradhan uba long u Myntri ka tnat pule pule ha kaba u la kular ban shim ki lad ki lynti ban pynbeit ïa ki jingeh kiba don ha kane ka skulbah.
