Shillong, Naiwieng 26
U Deputy CEM ka KHADC, Bah Pynshngaiñ N Syiem u la ong ba ka jingpynïeng kyrtong jong ka Voice of People Party (VPP) ïa uwei na ki MDC ba mynta (ka JHADC) ban ïa aireng ha ka ilekshon MDC ban wan, ka kdew shai ïa ka jingdonkam jong ki ‘riew rim bad ‘riew thymmai ban pyntyllun ïa ki kam jong kano-kano ka shlem treikam.
Ka State Election Committee (SEC) jong ka VPP dang shen ka la pynbna ïa ki kyrteng jong ki kyrtong ki ban ïa aireng sha ka ilekshon MDC ka ban sa long ha Khasi Hills Autonomous District Cou-ncil bad Jaiñtia Hills Autonomous District Council (JHADC).
Napdeng kine ki kyrtong, la mih ka kyrteng jong uwei na ki MDC ba mynta ka JHADC, u Bah Andrew Shullai u ban long u kyrtong ka VPP na Jowai-North konstitwensi.
Hashuwa, ka la don ka jingkynnoh na ka liang ka VPP ba ki MDC ba mynta ki dei kiba la kut por ne ‘expired’ bad kiba dang bteng ban don ha ophis wat hadien ka jingkut noh ka samoi treikam jong ki.
“Yn ym lah ban ñiew ïa ngi kum ki ‘expired’ MDC naba la pynjlan ïa ngi katkum ka nongrim jong ka Khyrnit ba 6 kaba kren shai ba lah ban pynjlan na ka bynta shisnem hapoh. Hynrei haba ïadei pat bad ka jingpynïeng ka VPP ïa uwei na ki MDC hapoh Ri-lum Jaiñtia – Bah Andrew Shullai, kane ka pyni shai ba ha kano-kano ka kynhun jong ki kyrtong, ngi donkam lang ïa ki ‘riew rim bad ‘riew thymmai kumjuh,” ong u Bah Syiem.
“Nga shu sngew ba kaei kaba ka VPP ka leh ka pyni shai ba ha kaba kut hi donkam lang ïa ki barim bad bathymmai khnang ban lah pynïaid ïa kano-kano ka shlem treikam,” u la ong.
Haba ai nuksa, u Dy. CEM u la ong ba ha kano-kano ka kynhun ki nongïalehkai phutbol, donkam lang ïa ki nongïalehkai barim bad bathymmai – ki nongïalehkai bathymmai ki don ïa ki buit thymmai, katba ki nongïalehkai barim ki don ïa ki buit barim bad ka jingïakynthup lang ïa kine baroh ar kan itynnad.
“Nga ngeit ba kaei ka jingleh jong ka VPP ka long ba hadien ba ki la pyrkhat bha, ki sngewthuh ba ngin ym lah kiar ïa ki ‘riew rim bad ïa ki ‘riew thymmai. Ki sngewthuh ba ha ka jingkhmih bniah jong ki ïa kiei-kiei ki jingsngew mynshuwa, lehse ki sngew donkam ba la kumno-kumno lada dei makna uba hap hapoh ka thup jong ki ‘expired’ MDC, hynrei ha kaba kut donkam hi ïa ki,” u la ong.
Ha kawei ka liang, haba kdew ba u la dei lypa u MDC ka Mawkhar-Pynthorumkhrah, u Bah Syiem u la ong lada ka VPP ka pynïeng ïano-ïano ruh kam da don eh kano-kano ka jingïapher naba ha kaba kut ka shong eh ha ka jingtreikam jong u, ka jingshaniah jong ki shnong, jong ki nongshong shnong la ka long hapoh konstitwensi, ha ki shnong bapher-bapher kiba hap hapoh Mawkhar-Pynthorumkhrah, ki dong bapher-bapher bad kumjuh haba ïadei bad ka jingpyrshang jong u ha i bor barit ha KHADC ban noh synñiang sha ka ri bad ka jaidbynriew.
Shuh shuh u la bynrap, “Nga tharai kita ki dei ki nongrim na bynta ki paidbah ban rai bad jied lehse kum u MDC/MLA namar haba kut hi ka shnong ha ki jingnoh synñiang. Lada ki buh ïano-ïano ruh ngan hap ban ïakhun ïa ki bad nga ngeit ba ki paidbah kin jied biang ïa nga da kaba pynshong nia ha ki jingsynñiang ki jong nga.”
