Shillong, Naiwieng 26
Ka Sorkar Jylla ka la dep ban shim jaka kumba 1722.32 akar ha New Shillong Township naduh u snem 1995-1996 haduh 2021-2022.
Katkum ka jingïoh jingtip lyngba ka hok wad jingtip kaba la wad da ka Kong Anges Kharshiing, ka Sorkar ka la pyntip ba ki don 31 ngut ki trai jaka kiba ka Sorkar Jylla ka la shim ha la ki jong ki jong ki snem naduh u snem 1995.
Ki snem kiba ka Sorkar Jylla ka la shim jaka ban tei ïa ka New Shillong Township ki long ha u snem 1995-96, 1997-98, 2003-2004, 2006-2007 bad 2021-2022.
Ïa ki jaka la bynshet ha ka jingpeit lang ka New Shillong Township Development Agency.
Tang ki tnat treikam ka Sorkar Jylla bad ki tnat treikam ka Sorkar Pdeng kum ka CBI ki la ïoh jaka.
Ki don kumba 38 tylli ki tnat treikam ka Sorkar Jylla bad katto-katne tylli ki tnat treikam ka Sorkar Pdeng kiba la ïoh jaka ha New Shillong Township bad ka jingsiew baroh na kine ka long palat T.83 klur sha ka tnat pynroi sor.
La ïathuh ba ka pisa lada kheiñlang lut ïa baroh ki jaka kiba la pynlut ban shim jaka ha New Shillong Township lyngba ka tnat pynroi sor ka la kot palat T.331 klur.
