Shillong, Naiwieng 26
Namar ka jingdon ki dukan jong ki bym dei Khasi kiba la plie beaiñ hapoh ka Them Ïew Mawlong khlem kino-kino ki kot ki sla kiba biang, ka Khun Hynñiewtrep National Awakening Movement (KHNAM) ha ka 26 tarik u Naiwieng 2024, ka la leit ban aiti da ka dorkhas ha u Deputy Chief Executive Member (CEM) u Bah Pynshngaiñ N Syiem ban dawa khang mardor ïa kitei ki dukan kiba don ha katei ka jaka.
Haba kren sha ki lad pathai khubor, u Working-President ka KHNAM, Bah Thomas Passah u la ong ba naduh ba la sdang ban plie biang ïa ka surok ha Them Ïew Mawlong, ka seng ka la lap ba ki don shibun ki dukan ki bym dei trai da ki Khasi, ki la sdang ban plie biang ha katei ka jaka ha kaba kitei ki dukan kim don satia ïa kino-kino ki kot-ki sla ba donkam kum ka Trading License bad kane ka la long kum ka jingpynkheiñ pyrshah ïa ka kyndon aiñ jong ka ‘Trading by Non-Tribal Regulation, 1954’.
“Ngi la kyrpad bad ban jur ïa u EM ba dei khmih ïa ka tnat khaïi-pateng ban leit khang mardor ïa kito ki dukan hangto namar ha shilynter jong kato ka surok ha Them Ïew Mawlong, ki bun bha ki kam khaïi-pateng kiba la ïaid naduh ki por mynshwa haduh mynta bad ngi la ong ba kane ka long pyrshah ïa ka ‘Trading by Non-Tribal Regulation, 1954,” ong u Bah Passah.
U la ong ba ka District Council ka don ïa la ka jong ka bynta ban tuklar lem halor kane ka jingdon jong ki bar jylla kiba la leh pyrshah ïa ka aiñ bad ong ba kaba sngewsih pat ka long ba ki dukan kiba don mar pyrshah bad ka District Council, ki dei ki dukan jong ki bar jylla suda hynrei ka la mih pat ka jingong na ka Council ba kan ïada ïa ka khaïi- ka pateng jong u jaidbynriew Khasi bad Pnar hynrei phewse, ka la kylla pynban da khongpong.
“Kaba sngewsih ban ong ba haba phi peit mar pyrshah jong ka District Council, ki don da ki dukan jong ki bar jylla suda. Ha kynroh phyllaw mar shiliang jong ka District Council, ki sawdong baroh kiba bun ki dei ki dukan jong ki bar jylla suda bad ki ong pat ban ïada ïa ka khaïi-pateng jong ngi bad kata ka long kaba sngewphylla”, ong u Bah Passah.
Shuh-shuh u Bah Passah u la ong ba ka Council ka dei ban leit khang mardor ïa kitei ki dukan bad ym dei satia ban shah ïa kitei ki bar jylla ba kin plie beaiñ ïa ki dukan jong ki khlem kano-kano ka laisen kaba donkam kaba dei ban ïoh na ka KHADC.
“Ngi ap khmih lynti ba kaei ka sienjam na ka liang ka tnat ba kan shim halor kane ka jingai jingthoh jong ngi”, bynrap u Bah Passah.
Da kaba pynpaw ruh ba ka aiñ ‘Trading by Non-Tribal Regulation, 1954’ haduh kane ka khyllipmat kaba mynta, ka District Council ka la pyndonkam ïa kane ka aiñ tang ban kamai pisa bad kam dei ban ïada ïa ka khaïi-ka pateng jong u khun Khasi-Khara.
