New Delhi, Naiwieng 26
Kum ka jingshimkhia ba mardor halor ki jingbthah ka tnad kam pohïing ka Sorkar Pdeng ban pynshitom kloi ïa kiba donkti, ka National Investigation Agency (NIA) ka la sdang ïa ki jingtohkit ba bniah halor lai tylli ki mukotduma kiba kongsan kiba ïadei bad ka jingshah thombor ba dang shen ha Manipur.
Katei ka tnad treikam ka la pynngat mukotduma thymmai biang haba ïadei bad 3 tylli ki jingjia ha ka 13 tarik u Naiwieng, 2024, hadien ba ka tnad kam pohïing ka Sorkar Pdeng ka la rai ban aiti noh ïa ki jingtohkit sha ka NIA da kaba pyrkhat ïa ka jingkhraw jong ki kam runar, hapdeng ka jingnang kiew jong ki kam thombor ha ka Jylla kaba don hapdeng ka jingïakynad bad da ka jingthmu ban sei madan ïa ka jingïasylla ba-heh ba sha lyndet jong kitei ki kam thombor ba shyrkhei.
Ha ka mukotduma ba nyngkong (FIR No. 29(11) Borobekra PS, 11 tarik Naiwieng 2024), bun tylli ki ïing ki la shah thang bad 2 ngut ki ‘riew paidbah ki la shah pynïap ha Borobekra. Hadien kane, ki lehnoh bym ithuh ki la rahbor bad pynïap ruh ïa 6 ngut ki briew kynthup ïa 3 ngut ki kynthei bad 3 ngut ki khynnah.
Katei ka jingjia ba shyrkhei ka la jia ha ka 11tarik Naiwieng, ha kaba katto-katne ngut ki lehnoh kieng atiar bym ithuh, ki la synreit kuli sha ka thanat Borobekra, kumjuh sha katto-katne ki ïing bad dukan kiba don ha Jakuradhor Karong, bad ki la thang ruh ïa kitei ki ïing. Ki pulit lem bad ki CRPF ka thanat Borobekra ki la pynphai kuli – kaba la ïalam sha ka jingïather kuli kaba jur. Hadien kane, la lap ruh ïa ar tylli ki met ïap hapoh ki ïing kiba la shah thang hadien ba la pynlong ïa ka jingwad bniah.
Ïa kane ka mukotduma la pynngat biang da ka NIA kum ka RC-15/2024/NIA/IMP hapoh ki kyndon bapher-bapher jong ka Bhartiya Nyaya Sanhita (BNS), 2023 bad Arms Act, 1959.
Ka mukotduma kaba ar ha kaba ka NIA ka la sdang ban tohkit ka don jingïadei bad ka jingshah hiar thma ha ka 11 tarik Naiwieng ïa ka Post jong ki pulit CRPF kaba ha thanad Jakuradhor Karong bad Borobekra, Jiribam, da ki lehnoh kieng atiar (original FIR No. 30(11) ba la pynngat ha Borobekra PS).
Ha kane ka jingjia, uwei u pulit CRPF u la mynsaw na ki kuli bad la pynkit noh ïa u sha Silchar na bynta ka jingsumar. Ha ka jingtalasi jong ki bor pahara bad ka kynhun pulit, la lap ïa ki met ïap jong ki lehnoh kieng atiar ki bym ithuh, ryngkat ki tiar ïaleh bad ki kuli na ki jaka ba marjan bad katei ka jingjia.
Ka NIA ka la pynngat mukotduma biang ïa kane kum ka RC-14/2024/NIA/IMP hapoh ki kyndon bapher-bapher jong ka Bhartiya Nyaya Sanhita (BNS), 2023 bad Arms Act, 1959.
Ka mukotduma kaba lai ka ïadei bad ka jingshah pynïap jong kawei ka longkmie ha Jiribram ha ki lehnoh kieng atiar.
Ïa kane ka mukotduma la pynngat nyngkong kum ka FIR No. 80(11)2024 ha Jiribam PS ha ka 8 tarik Naiwieng 2024 – ka NIA ka la pyngnat mukotduma biang kum ka RC-13/2024/NIA/IMP hapoh ki kyndon ba ïahap jong ka Bhartiya Nyaya Sanhita (BNS), 2023, Arms Act, 1959, bad UA(P) Act.
Ki kynhun ka NIA ki la leit jngoh ruh ïa ki jaka ha ka 21-22 Naiwieng, 2024 bad sdang ïa ka jingtohkit. Ka jingpyntreikam ban aiti ïa ki kot ki sla jong ka mukotduma na ki pulit sha ka NIA ka dang ïaid mynta.
