Shillong, Naiwieng 26
U MP ka seng Congress na Tura, u Saleng A Sangma u la ong ba ym dei ban pyrkhing than ki kyndon ïa ki samla pule kiba dei ban ïoh ïa ka bai bam, bad pyntip ba u la ïakren ba donkam ban aiti biang sha ki nongmihkhmat bad sha ki Rangbah Shnong kumba la leh ha ki por ba la dep ba kin ai ïa ki syrnot ka ïoh ka kot ki longïing na ka bynta ban ïoh ïa ka bai bam.
U la ong ba ka jingbuh kyndon ka Sorkar ïa ki samla pule kiba dei ban ïoh ïa ka bai bam ka la wanrah jingeh shibun namar ka long kyllaiñ bha khamtam ïa kito kiba dei na ki thaiñ nongkyndong.
U Saleng uba dei ruh u dkhot hapoh ka Parliamentary Committee Perso-nnel, Public Grievances, Law and Justice, u la ïathuh ba la ïakren ruh hapoh ka committee ïa kane ka jingeh ba mih ha kaba ïadei bad jingai bai bam ïa ki samla pule, ha kaba la bthah ban pynbeit ruh ïa kita ki jingeh.
“Nga la thoh ruh sha u Myntri ba dei khmih ka Sorkar Pdeng ha kaba ïadei bad ka bai bam ki samla pule ba dei ban pynbeit noh kloi, lem kumta ka jingpyrkhing kaba buh mynta kan sa dang bteng”, u la ong.
U la ong ba ka don ka jingjngai hapdeng ki samla pule bad ki bor ba dei khmih, ha kaba kim lah ban ïakynduh ïa ki BDO bad kiwei ki ophisar ban pan ïa ki syrnot, bad kaba kham phylla ka long ba ki samla pule tang ban ïoh ïa ka bai bam ki hap ban ai ‘affidavit’ na ka bynta ka Income Tax.
U la ong ba bunsien ka jingbym biang ka jingtip, ka la pynduh pynban ïa ki samla pule ban aplai bai bam bad ka sorkar ka dei ban ai ka jingshai kaba pura sha ki khnang ba kin suk.
“Ki samla pule khamtam na nongkyndong kim tip kumno ban leh ïa ka ‘affidavit’, kumno ban ïoh ïa ki muktiar ban pynleh”, u la ong.
Katkum ka jingong u Saleng, ym dei satia ban buh por ïa ki samla ban pynbiang ïa ki kot ki sla na ka bynta ban ïoh ïa ka bai bam, hynrei dei ban leh katkum ka jingstad ‘digital’, da kaba pynshai bha ruh ïa kiba aplai ban ïoh bai bam kumno ba kin leh.
Lah ban kdew ba ka Sorkar Jylla ka la ïoh T.100 klur na ka Sorkar Pdeng na ka bynta ban ai ïa ka bai bam ki samla pule kiba dei hok ban ïoh kiba don 49,628 ngut.
