Shillong, Naiwieng 27
Ka Sorkar Jylla ka la pynkhreh ban ïaid shaid-shaid bad ka jingpynlong kam noh ïa ka jaka pule doktor hapoh ka Jylla, namar ha ka Sngi Balang ka Kynhun Myntri ka la mynjur ïa ka Meghalaya Health Service Academic (MHSA) Rules, 2024 na ka bynta ban pynthikna ba ka medical college kan sdang treikam naduh u snem ban wan.
Ka Myntri ba khmih ïa ka tnat ka Koit ka Khia, ka Dr Mazel Ampareen Lyngdoh ka la ong ba ka jingwanrah ïa ka Service Rule ka long ban lah thung kam ïa ki nonghikai ha Shillong Medical College bad ka Sorkar ka la buh thong ban sdang ïa ka jingpule doktor ha u snem 2025-26, ha kaba yn pdiang nyngkong shwa ïa 100 ngut ki ban pule ha Shillong Medical College.
“Khnang ba ka tnat kan pynthikna ba ngin lah pyntreikam ïa ka Medical College hapoh ka por ba la buh, ngi la wanrah ïa ka service rules na ka bynta ban thung kam ïa ki nonghikai ki ban pynïaid ïa ka Medical College”.
Ka la ïathuh ba na ka bynta ka Shillong Medical College ka Sorkar ka la pynlut kumba T.16 klur.
Ka Myntri ka pyntip ba ka tnat ka la sdang ban khot ‘tender’ ïa kiba bun ki kam kiba donkam ban hap don na ka bynta ban sdang ïa ka Medical College.
Ka Dr Ampareen ka la ong ba ka Meghalaya Health Service Academic Rules, 2024 kam don jingïadei ei-ei bad ka PA Sangma Medical College kaba la pynïaid da ka kynhun shimet.
“Kane ka dei na ka bynta ki Medical College ka Jylla namar ka donkam ïa ka Service Rules ka Jylla bad kumba long kiwei-kiwei ki kam, phim lah ban shu thung kam, phim lah ban shu pynïaid ïa ki kam lada phim don lypa ïa ka service rules,” ka la ong.
Lah ban kdew ba ka Sorkar ka la pynkhreh ïa ka Shillong Civil Hospital bad ka Ganesh Das Government Maternal and Child Health Hospital, Shillong kum ka jaka pule doktor jong ka Shillong Medical College.
Ka Dr Ampareen ka la pyntip ruh ba ka sorkar ka la don lypa ki doktor ki ban long ki nonghikai kiba na ki hospital ka Sorkar ban hikai hapoh ka Shillong Medical College nalor kiwei-kiwei ki ban pynbit pynbiang ïa ka jingtreikam ha ka jaka pule doktor.
Ha kaba ïadei bad ka Tura Medical College, ka Myntri ka la pynpaw ka jingkyrmen ba ha Tura ruh ka Sorkar kan sa lah ban pyntreikam noh kham kloi, hynrei ka la ong ruh ba ka dang donkam sa katto-katne por namar ki don ki kam kiba hap ban leh.
Ha kajuh ka por ka Dr Ampareen ka la ïathuh ruh ba ka Sorkar ka la mynjur ïa ka Meghalaya Dental Health Service Rule, 2024 ka bym pat don baroh shi katta.
“Kane ka long na bynta ban pynbiang ïa ka rukom treikam kiba la sahkut baroh shi katta, ba kynthup ha ka thung kam, ban pynstet ïa ka jingkyntiew kyrdan, bad kiwei ki kam kiba ïadei bad ka jingsumar bniat”, la ong ka Myntri.
