Shillong, Naiwieng 27
Ka MLA kaba dang shu shahjied na Gambegre konstitwensi, ka Dr Mehtab Chandee Agitok Sangma ka la bamsmai kum ka dkhot bapura ka Ïingdorbar Thawaiñ kaba khatwei ka Jylla ha ka Sngi Balang.
La pynsmai ïa ka Dr Chandee kum ka dkhot ka Ïingdorbar Thawaiñ ka Jylla da u Lamphang ka Ïingdorbar Thawaiñ u Thomas A Sangma ha ka jingsakhi lang u Myntri Rangbah u Conrad K Sangma, ki Myntri Sorkar, kiba kynthup ïa u Symbud Myntri Rangbah Bah Prestone Tynsong, Bah Sniawbhalang Dhar, nalor ki MLA bad kiwei kiwei.
Hadien ba la dep ban bamsmai, ka Dr Chandee ka la ong ba kum kaba la shahjied ban mihkhmat ïa ka konstitwensi kan pyrshang ban trei na ka bynta ban kyntiew ïa ka konstitwensi kumba ki paidbah ki la ai ka jingkyrshan ban don bynta lang bad ka Sorkar na ka bynta ki kam pynroi kiba ka konstitwensi ka dang donkam shibun eh.
Ka la ong ba ban long nongmihkhmat ka dei ka kam kaba dawa bha ban hap leh shibun ki kam bad kum ka MLA kan pyrshang ban pynurlong ïa ki jingangnud kumba la khmih lynti da ki paidbah.
Haba kylli kiei ki jingduna kiba ka lap bad kiba hakhmat eh ban leh eiei ha Gambegre konstitwensi, ka Dr Chandee ka la ong ba ha ka jingleit jong ka kylleng ki jaka, ka lap ba ki don bun ki jingduna kiba donkam ban leh eiei, bad kiba kham hakhmat ki long ka jingshna surok sha kiba bun ki shnong ki bym pat ïoh surok, ban pynbiang ïa ki lad jingsumar ha ka liang ka koit ka khiah bad ki don ruh ki shnong ki bym pat ïoh bording ilektrik.
Haba kren shaphang ka bynta jong ki kynthei ha ka saiñ pyrthei, ka Dr Chandee kaba dei ruh kawei napdeng saw ngut ki MLA kynthei ha kane ka Ïingdorbar Thawaiñ kaba khatwei, ka la ong ba ka dei ka jingshisha ba ki kynthei ki kham duna ban rung sha ka saiñ pyrthei bad kam dei ka kam kaba suk namar ki don bun ki jingeh bad jingdawa ban leh kum ki nongmihkhmat paidbah.
Hynrei ka la ong ba kum ki kynthei kiba ïaryngkat lang ha ka imlang-sahlang ki dei ban mih shakhmat kham bun ngut ban ïashimbynta ha ka saiñ hima-sima.
Ka Dr Chandee ka kyrmen ba ki kynthei kin nang ïoh mynsiem ban mih shakhmat bad ïashimbynta ha ka saiñ pyrthei.
Da ka jingshahjied ka Dr Chandee kum ka MLA na Gambegre konstitwensi, ka NPP mynta ka la don 32 ngut ki MLA ha Ïingdorbar Thawaiñ.
Da ka jingshahjied ka Dr Chandee ha ka ilekshon MLA shiteng samoi na Gambegre, ka Ïingdorbar Thawaiñ mynta ka la don lut baroh ki dkhot jong 60 ngut.
