Shillong, Naiwieng 27
Ka Shillong Manipuri Students’ Union (SMSU) ka pynpaw ïa ka jingsngewkhia bad ka jingsngewsih jur halor ka jingshah pynïap ba dang shen ha Jiribam, Manipur, ha kaba ki khynnah rit ba lui-lui kiba dang 2 snem & 5 bnai, 8 bnai bad 8 snem ka rta bad lai ngut ki kynthei ba lui-lui ki la shah rahbor na thaiñ Borobe-kra, Relief Camp bad shah pynïap dusmon khlem da kheiñ briew shuh ïa ki ha ka 12 tarik Naiwieng, 2024.
“Ngi pynrem jur ïa kum kine ki kam bym kheiñ briew shuh bad jingpynïap ïa ki khynnah rit bad kynthei ba lui-lui ha ka rukom ba dusmon bad ba ishyrkhei,” ong ka seng ha ka kyrwoh khubor.
Ha kajuh ka por, ka seng ka kyrpad ïa ki bor aiñ ba dei khmih ka Sorkar Pdeng bad Sorkar Jylla ban pyntikna ïa ki jingtohkit kiba kloi (bad ba tikna) kumjuh ban shim ki lad ki lynti kiba tyngeh bad ban shim ruh ïa ki sienjam ban pynngat noh kloi ïa kiba donkti ha ka jingpynsaja kaba tyngeh bad ban pynïoh ïa ka hok.
“Kane ka jinglong-jingman kaba sngewsih ka kdew shai ba ka shong suk shong shngaiñ ha Manipur ka la pulom lut,” ong ka kyrwoh.
Kumta, ka seng ka dawa ïa ka Sorkar thymmai kaba don jingkyrmen bad kaba tei ha Manipur – ban wanrah biang ïa ka jinglong-jingman kumba ju long bad ka jingsuk ha ka Jylla baroh kawei.
“Ka Sorkar Manipur lem bad ka Sorkar Pdeng ki dei ban batai shai ïa ki jingkitkhlieh bad jingsngewkhia ban leh ïa kaba donkam ha ki rukom kiba biang tam kumjuh ban pyntikna ba ka jingim bad ka jingdon-jingem jong ki paidbah ka Jylla kan long kaba shngaiñ bad ban ïoh jingïada la ka long ha kano-kano ka rukom,” pynkut ka kyrwoh.
