Shillong, Naiwieng 27
U MLA ba marwei na ka Congress, Bah Ronnie V Lyngdoh u la ong ba ka jingjied ki paidbah ïa ka kurim jong u Conrad K Sangma, ka Mehtab Chandee Agitok Sangma ka long namar ki peit ïa ka NPP kaba dei ka seng kaba synshar ïa ka Sorkar Jylla namar ki kwah ban wanrah ïa ki kam pynroi hapoh ka konstitwensi.
U la ong biang ba ka jingjied ki paidbah ïa u Saleng Sangma uba dei u kyrtong Congress ha ka ilekshon MP Lok Sabha na Tura ka dei namar ki kwah ban jied ïa ka Congress ban ïakhun pyrshah ïa ka BJP ha Delhi kaba thmu ban pynduh ïa ki hok jong ki rit paid.
U Bah Ronnie u la ong ba ka jingrem ka Congress ha Gambegre ka lah ban dei ba ki paidbah kim sngewtynnad ïa u kyrtong bad dei na kata ka daw ki jied ïa ka kyrtong NPP.
Ha kajuh ka por u la ong ba man ka ilekshon ka ïapher na kawei sha kawei pat. U la ong haba don ha ka Sorkar, ki pyndonkam da baroh ki buit ki bor.
“Naduh ba nga rung sha ka Congress, nga la ïaineh haduh mynta namar nga shim ba dei ka Congress kaba la ai District Council, kaba la ai Jylla lajong ïa ngi ha u snem 1972,” u la ong.
U la ong ba kiwei ki riewlum kiba hap ha Assam ki shah leh beiñ haba ki hap ha jingpeit ka jylla Assam hynrei ka Meghalaya ka la ïoh ban synshar hi.
U la pynpaw ba ki paidbah ka ri India kin sa ai biang ka jingshaniah ïa ka Congress namar mynta ki MP ha Lok Sabha ki la don palat shispah ngut.
