Kumba ka paw mynta, hato ka don ka jingbym ïasngewthuh jingmut ne ka jingbym ïahap jingmut hapdeng ki Myntri ka Sorkar Jylla ha kaba ïadei bad ka mat jong ka jingthmu ban pynkynriah ïa ki nongdie madan? Dang ha ki bnai ba la leit, na ka liang jong u Myntri ka tnat Jngohkai u Bah Paul Lyngdoh, ha man ba ïakren bad ki lad pathai khubor u la kren shai ba ka Sorkar kan pyndep noh ïa ka jingpynkynriah ïa ki nongdie madan sha ki jaka ba la ithuh da ka Sorkar hapoh u bnai Naiwieng na ka bynta ban wanrah ïa ka jingkylluid ha ka leit ka wan bad ka jingitynnad jong ki bynta ka thaiñ Khyndailad. Katba u Myntri ka tnat Pynroi Sor, Bah Sniawbhalang Dhar pat u la ong ba ka Sorkar kam pat kyrkieh satia ban pynkynriah bad kan dang ïakren pynbeit shwa khamtam ba la poi ka aïom Khristmas.
Ha kine ki taïew bad ki bnai ba la leit, ka la don ka jingkhih na baroh ar liang, kata na ka liang ka Sorkar Jylla kumjuh na ka liang ki nongdie madan kiba la pyneh triang ban khih na ka jaka kaba ki ju shong die jingdie ban bsa bad pyndap ïa la ka ïing ka sem. Dang ha kine ki sngi kiba la leit, ki nongdie madan kum ka dak ka jingpyrshah ïa ka jingkren jong u Myntri ka tnat Jngohkai, ki la sah miet syndon ha ki jaka ba ki ju shong die jingdie wat hapdeng ka miet kaba khriat tasam. Kumta ngim lah ban tip shano kane ka kam kan ïalam. Hato ka Sorkar kan lah shisha ban pynkynriah sha kita ki jaka kiba ka la pynkhreh ne na ka liang jong ki nongdie madan kin pyneh beit triang ban khih na ki jaka kaba ki ju shong?
Ka thaiñ Khyndailad ka dei ka jaka kaba thnem bha ha ki jingleit thied jingthied naduh ki jaiñ ki nep, ki tiar shna kti, ki tiar electronic, ki mobile, ki jaka leit bam. Nalor kane, ka Khyndailad ka la paw bha namar ki bam surok ne kita kiba ngi ong ha ka ktien nongwei ki ‘Street Food’ ha kaba lah ban ïoh ïa bun jait ki jingbam. Ha kum kane ka por ba la jan dei sa ka aïom Khristmas, ka jingrung jingmih jong ki nongleit thied jingthied na ka bynta ban pynkhreh-pynkhrum ïa ka jinglehkmen Khristmas sha kane ka ïew kan long kaba jur katta-katta bad la thikna ba ka jingkhapngiah ruh kan long kaba jur bha, kaba ym dei shuh kaba thymmai hynrei kaba la ju sakhi man la ka por. Ka jingbym don ïa ki ïew heh sha kiwei pat ki bynta jong ka sor Shillong lait na ka Khyndailad bad Ïewduh ka dei kawei na ki daw kaba wanrah ïa ka jingkhapngiah kaba jur namar haba ki paidbah ki tuid sha kine ki ïew, ki nongdie jingdie ruh ki tuid lang sha kine ki jaka ban die ïa la ki mar ki mata.
Kumta haba phai biang sha ka jingthmu jong ka Sorkar Jylla ban pynkynriah ïa ki nongdie madan kiba la dep ban register ïalade sha kiwei pat ki jaka kiba la dep ban ithuh, hato kane kan urlong shisha? Haei kita ki jaka kiba la dep ban ithuh ban pynkynriah ïa ki nongdie madan? Balei ki nongdie madan ki pyneh ban khih haba ka Sorkar ka la ithuh ïa ki jaka ban pynkynriah? Ngi sngew ba baroh ar liang ki don ïa la ki jong ki nongrim bad ki jingangnud. Ka Sorkar ka angnud ban wanrah ïa ka jingkylluid, jingkhuid bad jingitynnad jong kane ka thaiñ, katba ki nongdie madan pat ki kwah ïa ka jaka kaba biang bad paka khnang ba kan ym ktah ïa ka kamai ka kajih ka jong ki ban ïoh pyndap ïa la ka ïing ka sem. Hynrei katkum ka jingpynpaw pat jong ki Myntri ka Sorkar Jylla ka long ka bym shai, namar uwei u ong ba hapoh u Naiwieng yn pyndep noh ïa ka jingpynkynriah, katba uwei pat u ong ba ka Sorkar kan ym pat leh kyrkieh satia ban pynkynriah. Ïano ngin ngeit bad ïano ngin ïaroh. Kumta ka long kaba donkam ban da don shwa ïa ka jingïasngewthuh jingmut ha la ïing haba kren halor kino-kino ki bynta khnang ba kan ym paw lehraiñ shabar.
