Shillong, Naiwieng 27
Ki shipai BSF jong ka 22nd Battalion ka Meghalaya Frontier ha ka jingkhynra kaba la pynlong ha ryngkat bad ki pulit ha khappud jong ka West Garo Hills District, ki la ïoh ban kem noh ïa ar ngut ki nong Bangladesh.
Kine ar ngut kiba la shah kem ki dei ba la tip kyrteng kum u Taharul Islam ba 23 snem na Chapainawabganj District bad u Md Sayed ba 30 snem na Rajshahi District.
Ha ka jingtohkit, kine ki nong Bangladesh ki la phla ba ki la wan rung sha India lyngba ka khappud Murshidabad, West Bengal mynta la hynriew bnai eiei. Ki la phla ruh ba ki ju leit ju wan sha Chennai ban trei bylla.
Ha kaba ïadei bad kane, ki BSF ki la ujor ejahar ïa kine ar ngut bad la aiti noh ïa ki sha ki pulit ka thanat Dalu ban tohkit bad leh ïa kaba donkam.
