Shillong, Naiwieng 27
Ka jingjur jong ki kam tuh kam thied ha kine ki sngi kiba mynta ka la long kaba shyrkhei haduh katta-katta. Kat shaba phai tang ka jingshah tuh la ka long ha ïing, dukan, arshaka, kali ter ter.
Katkum ka khubor kaba la ïoh na ki pulit la ong ba u John Paul Malngiang u la ai ka jingujor ba ha ka miet hapdeng ka 24 bad 25 tarik mynta u bnai, ki runar bym lah ban ithuh ki la ïoh ban prong jubor ïa ka dukan die tiar shna ïing kaba don ha ka shnong Surok Spar ha Sohïong, East Khasi Hills.
La ong ba ki runar hadien ba ki la dep ban prong shapoh jong kane ka dukan, ki la tuh ïa ki mar shna jingtei kum ka dewbilat, u nar rod bad kiwei kiwei kiba la shongdor kumba T.10 lak eiei.
Ha kawei pat ka khubor na ki pulit la ong ba u Dapkupar Syngkon u la ai ka jingujor ba ha ka por mynsngi jong ka 25 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-AC-7245 na Shillong College Campus, Shillong.
Ha kaba ïadei bad kane, na ka liang jong ki pulit hadien ba ki la ïoh ka jingujor, ki la pynïaid shakhmat ïa ka jingtohkit na ka bynta ban lap ïa ki jingshisha bad kumjuh ruh ban thwet ïa ki briew kiba donkti ha kane ka kam.
