Shillong, Naiwieng 27
Ka Meghalaya Pavilion ka la ïohpdiang ïa ka khusnam takma rupa napdeng ki Jylla bad ki Union Territory ha ka Ri halor ka jingtbit na ka bynta ka jingpyni dur ha ka rynsan jong ka 43rd India International Trade Fair (IITF) 2024 kaba la pynlong da ka India Trade Promotion Organi-sation (ITPO) ha ka jingïakop jong ka Award Presentation ha ka 27 tarik u Naiwieng, 2024 ha Bharat Mandapam, jong ka nongbah New Delhi.
Ïa kane ka khusnam jong ka jylla la pdiang da u WG Momin uba long ruh u Director jong ka Meghalaya Pavilion jong ka Directorate of Information and Public Relations ha ka jingïadon lang u Bah SL Mawlong uba dei ruh u nongpynïaid paidbah jong ka DIPR, u BF Sunn Functional Manager, Nongstoiñ bad u AD Shira Functional Manager, ka tnat khaïi pateng bad ki karkhana Ampati.
Ïa kane ka khusnam sha ka jylla Meghalaya la sam da u Pradeep Singh Kharola, Chairman bad Managing Director jong ka ITPO uba la long ruh kum u kongsan ha kane ka sngi.
Lah ban kdew ba ïa ka IITF la pynlong da ka ITPO naduh ka 14 tarik u Naiwieng haduh ka 27 tarik u Nohprah 2024 halor ka phang, “Viksit Bharat @2047”, kaba ïahap bad ka jingthmu jong ka India ban long ka Ri bad ka jaidbynriew kaba kiew bad kaba pynpaw ïa ka jingkiew shaphrang, ka jingpynmih thymmai bad ka jinghiar pateng jong ki jinglong tynrai. Ha kane ka ïew ïadie ïathied ne ka Trade Fair la wan ïashim bynta da ki Jylla bapher bapher, nangta ki Union Territory, ki Ministry bad ki karkhana shimet na kylleng ki bynta jong ka ri India.
Ki tnat kiba mihkhmat ïa ka jylla Meghalaya ha kane ka rynsan jong ka IITF 2024 ki kynthup ïa ka tnat jngohkai pyrthei, Industries, ka Meghalaya Age Limited kaba don ha New Delhi bad ka Directorate of Information and Public Relations kum ka tnat Nodal. Nalor ki tnat Sorkar, la don ruh ki 8 tylli ki unit kiba la kyrshan da ka Directorate of Commerce and Industries kiba la shim na ki bynta bapher bapher jong ka jylla ruh ki la wan ban ïashim bynta ha kane ka ïew pyninam na ka bynta ban pynïaid ïew ïa ki mar tynrai.
